Memorandum quod cum inter dominum Robertum Sarum episcopum ex parte una et Henricum abbatem et conventum Scyreburne ex altera super amerciamentis provenientibus de pane et cerevisia venditis contra assisam de hominibus praedicti abbatis infra libertates praedicti episcopi existentibus in hundredis de Syreburne et de Bemenistre discordia fuisset suscitata asserente episcopo praefato hujusmodi amerciamenta ad jus suum pertinere et se et praedecessores suos in eorum seisina diu et in pace extitisse praedicto abbate penitus contrarium asserente tandem mediantibus discretis viris domino Roberto decano et capitulo Sarum inter partes hujusmodi amicabilis compositio intercessit videlicet quod praenominato episcopo pro se et successoribus suis de assensu capituli Sarum omnis amerciamenta de pane et cerevisia contra assisam venditis et de cerevisia male braciata de omnibus hominibus in terris et feudis praedicti abbatis infra hundreda praedicta existentibus jus petitionem et saisinam si quam habuit dicto Henrico abbati et successoribus suis futuris et perpetuis temporibus remittente et quieta clamante idem abbas promisit et se et successores suos per cartam suam et conventus sui obligavit quod pro hac remissione et quieta clamatione praedicto episcopo et successoribus suis dimidiam marcam annuam ad Pascha in perpetuum persolvet apud Syreburne Et ut haec compositio futuris et perpetuis temporibus rata et stabilis perseveret confecta sunt inde inter partes duo scripta quorum unum signatum sigillis praedictorum episcopi et capituli penes praedictos abbatem et conventum in perpetuum remanebit et aliud signatum sigillo abbatis et conventus penes dictum episcopum et capitulum in perpetuum remanebit His testibus dominis Roberto decano Rogero praecentore Ada cancellario Johanne thesaurario Sarum Egidio archidiacono Berksyre Stephano archidiacono Wilthesyre Hugone abbate Abbedesbire Henrico de Sancto Edmund Willelmo de Cambe Ricardo de Cnolle Petro de Cumbe et aliis Datum apud Syreburne per manus Henrici Isumberd [al Ysembard] monachi xvi Kalend Septembris anno gratiae m cc xxxviii

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.