In nomine Domini anno Incarnationis Dominicae in crastino Nativitatis beatae Mariae m cc lxxi vacante decanatu ecclesiae Sarum per confirmationem electionis celebratae de magistro R de Wychampton decano Sarum in episcopum et pastorem dictae [ecclesiae] electo ac per decursum temporis de consecrandis episcopis a canonibus diffiniti necnon [per] bonorum administrationem adeptam et pacificum administrationis exercitium die praenotato praefixo a toto capitulo ad eligendum decanum vocatis omnibus qui debuerunt et potuerunt commode interesse in ecclesia cathedrali invocata Spiritus Sancti gratia placuit omnibus et singulis per viam compromissi decanatui vacanti providere et sic de communi voluntate omnium et singulorum electi erant quinque compromissarii videlicet magister w[illelmus de Sherborne] subdecanus r[adulfus Hecham] cancellarius magister n[icholaus de Capella] archidiaconus Sarum dominus Walterus de Merton et dominus Martinus de Litlebure canonici dictae ecclesiae in quos totum capitulum transtulit hac vice concorditer et unanimiter vota sue promittentes se illum recepturos in decanum ecclesiae Sarum quem ipsi quinque vel major eorum pars de gremio ecclesiae ex se vel ex aliis eligerent Qui secedentes in partem habito inter se diligenti tractatu injunxerunt quatuor compromissarii quinto scilicet magistro w[illelmo] subdecano quod discretum virum magistrum w[alterum Scamel] thesaurarium virum providum ac approbatum necnon et spiritualibus et temporalibus circumspectum in quem omnes quinque compromissarii vota sua direxerunt concorditer vice omnium et singulorum in decanum eligeret Dictus vero subdecanus mandato ipsorum quatuor et voluntate totius capituli dictum magistrum w[alterum] thesaurarium elegit per haec verba In nomine Patris et Filii et Spiritus Sancti Amen Ego Willelmus subdecanus Sarum vico mea et vice compromissariorum meorum ac de voluntate omnium et singulorum dicti capituli virum discretum magistrum Willelmum thesaurarium eligo in decanum ecclesiae nostrae Sarum et ipsam electionem in scriptis et solemniter publico in communi Quam electionem omnes protinus acceptantes et gratam habentes et placitam supplicarunt eidem electo ut electioni hujusmodi propter Deum et utilitatem ecclesiae consentiret qui licet quamplurimum reniteretur et se multipliciter excusaret tandem fratrum devictus instantia sibi super hoc supplicantium voluntati divinae suum committens arbitrium electioni de se factae consensit et cum decantatione hymni consueti Te Deum laudamus duxerunt ad majus altare solemniter ut est moris et electionem hujusmodi fecerunt rite clero et populo publicari In cujus rei testimonium praesentibus sigillum suum commune fecerunt apponi Datum et actum die et anno supradictis in capitulo Sarum

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.