Universis Christi fidelibus praesentes literas visuris vel audituris Robertus [de Wykehampton permissione divina Saresb ecclesiae minister humilis salutem in Auctore salutis Ex antiquis registris et memorabilibus diversis in archivis ecclesiae nostrae repertis comperimus quod sanctae recordationis Osmundus Sarum episcopus primus in eadem ecclesia canonicorum et clericorum aliorum collegium ordinavit et praebendas tam ex bonis patrimonialibus ipsius ecclesiae quam ex beneficiis et rebus aliis liberalitate regum et aliorum nobilium ad hoc collatis distinxit et providit Ex tunc autem bonae memoriae Rogerus ejusdem ecclesiae episcopus ecclesiam de Heghtredebyre nostrae dioceseos et ecclesiam de Godelmyngges Wyntoniensis dioceseos cum pertinentiis earundem ex liberalitate serenissimi principis Henrici tunc regis Angliae in unam praebendam ecclesiae nostrae praedictae collatas unam esse praebendam in eadem ecclesia nostra statuit et ordinando decrevit a cujus ordinationis tempore de quo memoria hominum non existit praebenda ipsa talis fuit licet nomine ecclesiae de Heghtredebyre intitulata et ejusdem praebendarii utramque praedictarum ecclesiarum cum pertinentiis earundem pacifice et inconcusse tenuerunt et possederunt pro unico beneficio usque modo Quod ne forsan tractu temporis subfuscante memoriam malitia aliquorum seu casu alio in dubium revocari possit in futurum habito super hoc cum decano et capitulo tractatu diligenti de eorum expresso consensu declaramus approbamus et confirmamus per praesentes statuentes et ordinantes expresse quod sicut hactenus ita futuris et perpetuis temporibus ecclesiae de Hegtredebyre et de Godelmyngges cum pertinentiis earundem universis sint una praebenda in ecclesia Sarum et ad sustentationem unius canonici ejusdem ecclesiae cedant in perpetuum In quorum omnium fidem et testimonium praesentes literas fieri fecimus et impressione sigilli nostri et sigilli praedictorum decani et capituli ad memoriam futurorum communiri Datum apud Wodford iii non Februarii anno gratiae m cc lxxx pontificatus nostri anno septimo

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.