Universis sanctae matris ecclesiae filiis ad quos praesens scriptum pervenerit Henricus thesaurarius Sarum salutem in Domino Ad universitatis vestrae volo pervenire notitiam quod cum suscitata esset querela inter me et Mariam priorissam et conventum de Kingtone super decimis de dominico Eliae de Stodlege quas infra limites parochiae meae de Calne de dono ejusdem saepedictae moniales habere dicebant haec tamen ad pacis perpetuae firmamentum compositio inter nos amicabilis intercessit videlicet quod ego quam tenuis et exilis ipsarum substantia quamque jugis apud Deum et intensa sit earundem devotio devote perpendens de voluntate et unanimi assensu venerabilis patris domini Roberti episcopi et domini Roberti decani et capituli Sarum pro me et successoribus meis sponte et absolute concedo intuitu caritatis ut dictum monasterium de Kingtone et moniales Deo servientes ibidem et quocunque tempore serviturae percipiant habeant et possideant integre pacifice et inconcusse in perpetuum omnes decimas quas percipere consueverunt de dominico supradicto reddendo inde annuatim memoratae ecclesiae de Calna pro bono pacis duas libras cerae in festo S Mariae Magdalenae Et sciendum quod a die confectionis instrumenti istius nihil eis accrescet in decimis provenientibus de terris praedicti Eliae contentis infra supradictam parochiam de Calne quocunque nomine censeantur Quod ut perpetuis temporibus inviolabile perseveret praesens scriptum sigilli mei impressione munivi Hujus rei sunt testes dominus Robertus decanus Rogerus praecentor Radulfus cancellarius Rogerus succentor Sarum magister Galfridus penitentiarius magister Radulfus de Eboraco magister Thomas de Ebbelesburne magister Willelmus de Len Willelmus de Leycestre canonici Sarum et plures alii Datum apud Sarum tertio idus Novembris anno gratiae m cc xliii

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.