Viro venerabili ac domino carissimo domino Stephano archidiacono Wiltesyre frater Nicholaus major minister totius ordinis Sanctae Trinitatis et Captivorum salutem in omnium Salvatore Quoniam ex relatione quorundam fratrum nostrorum accepimus quod vos construxistis quendam locum religionis quem velletis per viros religiosos deserviri nos si vestrae placeret dominationi prompti sumus et parati voluntati vestrae secundum Deum in omnibus obedire et fratres nostros ad vos mittere videlicet fratrem Radulfum vicarium nostrum in Anglia et Scotia vel fratrem Nicholaum de Northfolkia qui auctoritate ordinis vobis et haeredibus vestris se poterunt obligare et tres capellani nostri ordinis vel plures secundum facilitates domus loco praedicto servient in perpetuum et hospitalitatem observabunt et si placet vobis in loco illo commorari eisdem fratribus praecipimus in virtute obedientiae et aliis ad vos venientibus praecipiemus quod vobis tam in temporalibus quam in spiritualibus consilium et auxilium impendant et vobis in omnibus obediant Et nos omnium bonorum quae fiunt et fient in ordine nostro tam in vita quam in morte vobis plenariam concedimus participationem Nos autem quicquid frater Radulfus praedictus et frater Nicholaus vel alter eorum secundum Deum et ordinem nostrum de consilio fratris J de Radinges de ordine fratrum Minorum fecerint vel ordinaverint ratum habebimus et firmum In cujus rei testimonium literas nostras patentes vobis transmittimus Dat anno Domini m cc xlv in octabis Dionisii

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.