In dei nomine amen Anno ejusdem a nativitate m cc octuagesimo indiccione octava die vigesima mensis Marcii cum inter religiosos viros dominum abbatem et conventum monasterii sancte Marie de Derleye ex una parte et parochianos ecclesie de Cruch[] quam ecclesiam dicti religiosi in proprios usus habent ex altera super inveniendam ymaginem beate Virginis que ymago stare debet in dicto cancello et omnibus aliis necessariis dicto cancello et eciam super aliis que pertinent ad sustentacionem et refectionem navis ecclesie predicte necnon et panem benedictum et alia onera ipsius ecclesie sustinenda orta est materia questionis coram reverendo patre domino J dei gracia Cantuariensi archiepiscopo tocius Anglie primate visitacionis officium in dicto loco auctoritate metropolitica excercente demum intervenientibus venerabilibus viris magistro Waltero de Corneria et aliis ipsius domini archiepiscopi de ipsa lite et discordia dicte partes ad talem concordiam unanimiter pervenerunt videlicet quod dicti abbas et conventus et successores eorum inperpetuum teneantur et debeant invenire et dare dicte ecclesie de Cruch[] ymaginem beate Virginis que in dicto cancello stare et poni debet et omnia alia neccessaria in dicto cancello tam in libris et ornamentis quam aliis ad ipsum cancellum pertinentibus excepto libro qui vocatur missale et calice quos calicem et missale invenire et dare debeant ipsi ecclesie parochiani predicti quocienscumque fuerit oportunum Ad panem vero benedictum et alia onera navis ecclesie supportandum sic actum est communiter inter eos videlicet quod dicti abbas et conventus solvere debeant illam partem dicti panis benedicti et aliorum onerum navis dicte ecclesie que eos contingit vel contingere potest racione illarum terrarum et possessionum seu mansionum quas habent et possident infra fines parochie seu ecclesie sue supradicte que terre possessiones vel mansiones aliquid de dictis oneribus hactenus portaverunt videlicet quod dicti abbas et conventus solvant partem contingentem eos de dictis pane benedicto et aliis oneribus prenotatis pro omnibus terris et possessionibus seu quibuscumque tenementis quas habent et tenent infra dictos fines exceptis illis terris et possessionibus quas dicta ecclesia de Cruch[] habebat et possidebat antea quam dicti abbas et conventus rectoriam seu possessionem dicte ecclesie habuissent que omnia et singula suprascripta inter prefatas partes sic acta et conventa promisit una pars alteri vicissim inter se solempniter per se et suos heredes et successores attendere servare et adimplere et non contra facere vel venire aliqua racione vel causa de jure vel de facto Et pro hiis omnibus servandis et adimplendis obligavit una pars alteri omnia eorum bona Promiserunt eciam una pars alteri reficere et restituere omnia dampna expensas et interesse que vel quas fecerit sustinuerit in judicio sive extra causa illius que premissa vel premissorum aliquid noluerit adimplere Et ad robur et firmitatem omnium premissorum prefate partes procurarunt hanc composissionem duplicari ut quelibet pars unam unius ejusdemque tenoris habeat sigillo predicti domini archidiaconi roboratam Acta fuerunt hec omnia in monasterio beate Marie de Derleye presentibus magistro Willelmo predicto Radulfo de Fornham Raynero de Florencia consociis domini archiepiscopi supradicti Waltero de Neuton[] presbitero Johanne de Ronon[] notario pupplico et pluribus aliis testibus

Source Fulltext: The Cartulary of the Wakebridge Chantries at Crich. A. Saltman. Derbyshire Archaeological Society Record Series, V.6. Derbyshire Archaeological Society. Derby. 1976.