Universis sancte matris ecclesie filiis presentibus et futuris Matildis de Percy comitissa de Warewic[] filia Willelmi de Percy et heres salutem Noverit universitas vestra quod pater meus abbaciam quandam Salleiam nomine fundavit in Cravena in terra nebulosa et pluviosa ita quod segetes jam albe ad messem per consuetudinem in culmo computrescant et ubi conventus per xl annos et amplius propter aeris intemperiem tanta inedia et omnium necessariorum inopia attritus est quod paupertatis eorum immensitas in contumeliam et obprobrium patris mei et omnium heredum suorum redundabat Tandem veto cognita eorum paupertate et causa paupertatis per consideracionem domini Clarevallensis abbatis et abbatum visitatorum provisum fuit ut memorata abbacia aut penitus destrueretur aut per advocatum ejusdem loci in aliquo ei unde honeste sustentari posset misericorditer provideretur Inde est quod spiritu Dei preventa et tacta dolore cordis intrinsecus tum super prefate abbacie destruccione tum super predicti conventus miseria et tam victus quam vestitus inopia intolerabili nolensque elemosinam patris mei ex toto deperire invocato nomine sancte Trinitatis et vivifice crucis Dei et Domini et salvatoris nostri Ihesu Christi sancteque Dei genitricis Marie in die Annunciacionis Dominice consilio et assensu domini Juliani Igniacensis et domini W Mortui Maris abbatum visitatorum presente eciam et assensum prebente domino Nicholao decano et persona ecclesie de Tadecaster et consilio domini W Vavasoris et aliorum proborum hominum et fidelium meorum et totius curie mee Deo propicio de ejusdem domus relevacione cepi diligencius tractare et quoniam in mente et proposito ex longinquo habueram ecclesiam beate Marie de Tadecaster ad viros religiosis transferre ejusdemque ecclesie beneficia in usus bonos et salubres per graciam et misericordiam Ihesu Christi convertere communi omnium consilio et assensu eandem ecclesiam beate Marie de Tadecaster cum capella de Heselwde et cum annua pensione ecclesie de Neuthona et cum omnibus appendiciis et libertatibus ad prefatam ecclesiam beate Marie de Tadecastre pertinentibus et unam carucatam terre in Catthona in qua secundum carnem nata fui liberam et solutam et quietam ab omni servicio seculari et omni exaccione et omni re ad terram pertinente Deo et beate Marie de Sallai obtuli et monachis ibidem Deo servientibus in liberam in puram in perpetuam elemosinam dedi concessi et presenti carta mea confirmavi ad prefatam abbaciam perpetuo in servicio Dei et in conventus victus et vestitus amministracione et in pauperum et peregrinorum suscepcione caritative sustentandam pro salute anime mee et Willelmi comitis de Warewic[] quondam sponsi mei et karissimi domini mei Henricy illustris Anglorum regis et pro anima patris mei Willelmi de Percy et Adelidis de Tunebrigie matris mee et Alani de Percy fratris mei et Agnetis sororis mee et omnium antecessorum et heredum meorum et omnium benefactorum predicte abbacie Quare volo ut antedicta abbacia prefata omnia ita libere et plenarie integre et honorifice possideat sicut aliqua elemosina liberius dari et possideri potest Et ego et heredes mei perpetuo ea prefatis monachis guarentizabimus et contra omnes homines sicut liberam elemosinam acquietabimus Hiis testibus Juliano Igniac[] W Mortui Maris Ernaldo Rievall[] Gaufrido Novi Monasterii abbatibus etc

Source Fulltext: Chartulary of the Cistercian Abbey of St. Mary of Sallay in Craven. Joseph MacNulty. Yorkshire Archaeological Society, V.99. Yorkshire Archaeological Society. West Yorkshire Print Co. Wakefield. 1934.