anno gracie m ccxlix die sancti Oswini martiris ita convenit inter dominum Reginaldum abbatem et conventum de Alnewic ex parte una et communitatem burgi de Alnemouth tunc presentes ex altera presidente et consentiente domino Willelmo de Vescy filio et herede Eustacii de Vescy de omnibus querelis decimarum piscium prius inter ipsos motis unde tota lis inde mota in hunc modum conquievit Ita scilicet quod per istam formam subscriptam inperpetuum de piscacione sua decimabunt ut cum in piscacione de doggedrawe debeant proficissi et aliquid alienum ex mutuo sibi acceperint in redditu suo prius illud mutuum sine decimacione restituent et quod residuum fuerit legitime decimabunt Et qui cum propriis catallis dictam piscacionem de doggedrawe inierit sine aliqua deduccione laboris vel expensarum totum cum ad portum proprium redierit integre decimabit Et si alibi devertant decimam denariorum ad propriam capellam fideliter reportabunt Et sciendum est quod si aliquid armamentum navis vel eciam ipsam navim quod absit in dicta piscacione perdiderint abbas et conventus de Alnewik in nullo nisi sponte de gracia sua voluerint eisdem de decimis suis ad reparacionem predictorum tenebuntur Preterea licebit dictis abbati et conventui et suis capellanis de Alnemouth ter in anno excommunicare generaliter omnes illos de villa de Alnemouth qui ingeniose et ex industria aliquid mutuabuntur sine necessitate ac intencione quod Sancta Ecclesia rectam decimam suam debeat amittere Et qui aliquid alienum ad istam piscacionem de doggedrawe faciendum ex mutuo acceperint in redditu suo illud per sacramentum corporaliter prestitum probare debebunt si suspecte fuerint persone Verno cum ad alecia capienda exierint et casu aliquod navis armamentum vel rethia perdiderint vel ipsam navem quod absit frangi contigerit de ipsis piscibus vel alecibus que tunc in ipsa navi continebuntur ista prescripta dampna restaurabuntur ex integro Et quod residuum fuerit secundum quantitatem suam fideliter decimabitur Et si minus inveniatur in illa navi quam quod sufficiat ad ista dampna restauranda ex integro abbas et conventus in nullo eis tenentur ad illam horam preter quam de illis piscibus qui tunc infra bordam navis inveniuntur et de omnibus aliis piscibus cuiuscumque generis fuerint sive de navibus sive batellis vel eciam de sagena capti fuerint decimam suam sine omni contradiccione persolvent de canabo autem et oleo debita decima cum aliis decimis secundum formam prescriptam predicte capelle de Alnemouthe remanebit [...]

Source Fulltext: Percy Cartulary. M. T. Martin. Surtees Society, V.117. Surtees Society. Andrews & Co. Durham. 1911.