Sciant presentes et futuri quod ego Simon filius Margarete dedi et concessi et hac presenti carta mea confirmavi Matildi filie mee duas acras terre mee cum pertinentiis in marisco scilicet in parochia de Alvitheleia iacentes inter terram domini Sawini et terram Hilde Iuvenis habendas et tenendas ipsi Matildi et heredibus suis vel suis assignatis de me et de heredibus meis libere et quiete integre et plenarie per liberum servicium duodecim denariorum pro omni servicio et seculari exaccione inde ad duos terminos anni reddendorum scilicet infra octabam sancti Michaelis sex denarios et infra octabam Pasche sex denarios Predicta autem Matildis terram predictam cum pertinentiis poterit dare vel vendere vel cuicumque assignare voluerit Ego vero Simon predictus et heredes mei warantizabimus predicte Matildi et heredibus suis vel suis assignatis predictam terram cum pertinentiis contra omnes gentes Si autem heredes mei predictam terram maluerint tenere in feodo quam predicta Matildis vel heredes sui vel sui assignati in dominio donent predicte Matildi vel heredibus suis vel suis assignatis sex marcas sterlingorum Hiis testibus domino Sawino de Wenintone Willelmo Lenveise Gervasio de Wenintone Ada Iuvene Stephano de Sobery Ricardo filio Geroldi Benedicto clerico Ricardo filio Rogeri et multis aliis

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 23. British Academy. Oxford University Press. Oxford. 1996.