Alvredus de Bendavilla et uxor sua Sibilla omnibus amicis et hominibus suis universisque sancte matris ecclesie filiis salutem Notum sit vobis nos dedisse et concessisse hospitali de Ierusalem in liberam et perpetuam elemosinam ecclesiam de Chauria et terram que fuit Rogeri Picoti cum omnibus predicte ecclesie et eidem terre pertinentibus pro anima Gilleberti filii Ricardi et pro anima Ricardi filii Gilleberti et pro anima comitis Gilleberti et pro animabus patrum et matrum et parentum et amicorum et filiorum nostrorum Willelmi et Rogeri et Gilleberti et pro salute domini nostri comitis Gilleberti de Clara et pro salute animarum nostrarum quatinus nos et illos participes faciat Ihesus Christus Dominus noster de omnibus bonis que facta sunt in Ierusalem a diebus apostolorum vel facienda sunt usque in finem seculi Huius donacionis sunt testes Baldewinus filius Gilleberti Moricius vicecomes Ranulfus de Chauria Godefridus de Chauria Willelmus suus filius Rodbertus presbiter Willelmus de Fanna Hugo prepositus Aylmarus prepositus Hec donacio facta fuit anno ab incarnacione Domini millesimo centesimo quinquagesimo primo

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 23. British Academy. Oxford University Press. Oxford. 1996.