Hec est convencio facta in crastino sancti Iohannis Baptiste anno Domini millesimo ducentesimo septuagesimo sexto inter dominum Petrum abbatem de Becco Herlewyn et eiusdem loci conventum ex parte una et fratrem Iosep de Chauncy dicte domus hospitalis Ierusalem priorem humilem in Anglia et eiusdem domus fratres et conventum ex altera videlicet quod predicti prior et fratres receperunt ad perpetuam firmam de predictis abbate et conventu omnes decimas tam maiores quam minores provenientes de decimis dominorum de Ferariis ad eosdem abbatem et conventum spectantes in villa et eciam parochia de Stebbynge pro duabus marcis sterlingorum annuis reddendis attornato dictorum abbatis et conventus qui pro tempore fuerit in Anglia vel eius certo nuncio litteras predicti attornati differenti apud Clerkenwelle London in festo sancte Trinitatis sine aliqua diminucione racione alicuius oneris inpositi vel inponendi ordinarii vel extraordinarii Ad hec confitentur et recognoscunt se teneri et obligant se et successores suos qui pro tempore erunt ad dicte pecunie solucionem singulis annis dictis abbati et conventui loco et termino supradictis faciendam prout superius est expressum et si contingant ipsos priorem et fratres in dicte pecunie solucione termino supradicto deficere volunt et concedunt iidem prior et fratres pro se et successoribus suis quod licebit procuratori seu attornato predictorum abbatis et conventus qui pro tempore fuerit in Anglia auctoritate propria ingredi dictarum decimarum possessionem in easdem percipere possidere et in proprios usus convertere necnon et prout voluerint in eisdem disponere sine aliqua contradictione seu impedimento dictorum prioris et fratrum et successorum suorum In cuius rei testimonium presenti scripto in modum cirografi confecto predicte partes sigilla sua alternatim apposuerunt videlicet parti penes dictos priorem et fratres residenti predictus abbas pro se et conventu suo sigillum suum apposuit et parti penes dictos abbatem et conventum residenti predicti prior et fratres sigillum eorum commune de unanimi assensu factum capituli sui apposuerunt Data apud Melcheburne in pleno capitulo prioris et fratrum anno supradicto

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 23. British Academy. Oxford University Press. Oxford. 1996.