Sciant presentes et futuri quod ego Laurencius filius Hugonis pro salute anime mee et animarum antecessorum et successorum meorum concessi dedi et hac presenti carta mea confirmavi Deo et beate Marie et beatis pauperibus hospitalis sancti Iohannis Ierusalem et fratribus eiusdem domus duos denarios annui redditus cum omnibus pertinentiis suis quos Walterus filius Hervei michi reddere consuevit pro quadam terra quam de me tenuit in villa de magna Mapeltrestede cum homagio predicti Walteri et heredum suorum et cum omnibus que michi et heredibus meis de predicto Waltero et heredibus suis accidere poterunt sine aliquo retento habendos et tenendos predictis fratribus et eorum successoribus in perpetuum in liberam puram et perpetuam elemosinam sicut aliqua elemosina liberius quiecius et melius dari potest Et ego et heredes mei warantizabimus acquietabimus et defendemus predictos duos denarios annui redditus cum omnibus pertinentiis suis et cum homagio predicti Walteri et heredum suorum predictis fratribus et eorum successoribus contra omnes homines in perpetuum Hiis testibus Ricardo de Kaketone Galfrido Ruffo Willelmo Scot Alano Apsalon Willelmo le Franceys Iohanne fabro Willelmo de Pentelowe et aliis

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 6. British Academy. Oxford University Press. Oxford. 1982.