Omnibus Christi fidelibus presens scriptum visuris vel audituris frater Benedictus de Hecham tunc custos domus hospitalis de Mapeltrestede salutem in Domino Noveritis me per assensum fratrum nostrorum hospitalis Ierusalem dimisisse et hoc presenti scripto cirografato concessisse Galfrido de Olmestede et Aubrede uxori sue et heredibus eorum quoddam mesuagium cum suis pertinentiis in villa de Bumstede quod mesuagium Helias Scalegray de dicta domo quondam tenuit quod quidem mesuagium situm est inter mesuagium Rogeri de Stanburne ex parte una et mesuagium Noremanni filii Hawisie ex altera habendum et tenendum predictis Galfrido et Aubrede uxori sue et heredibus eorum vel cuicumque per assensum dicte domus hospitalis et successorum eius dare vendere vel assignare voluerint ita quod si predicti Galfridus et Aubreda uxor eius ipsis viventibus predictum mesuagium alicui dederint vel assignaverint istud scriptum dicte domui hospitalis reddent ita quod ille qui post predictos Galfridum et Aubredam uxorem eius dictum mesuagium tenuerint de dicta domu hospitalis teneat libere quiete et in pace reddendo inde annuatim dicte domui hospitalis de Mapeltrestede et successoribus suis sex denarios ad duos terminos anni videlicet ad festum sancti Michaelis tres denarios et ad Pascha tres denarios pro omnibus serviciis consuetudinibus sectis [curiarum] et omnibus terrenis demandis salvo tamen dicte domui hospitalis iure debito et consueto ad obitum cuiuscumque tenentis Et ego prefatus Benedictus et successores mei warantizabimus acquietabimus et defendemus predictum mesuagium cum suis pertinentiis predictis Galfrido et Aubrede uxori sue et eorum heredibus contra omnes gentes sicut per cartam donatoris et feoffatoris nostri warantizati sumus per predictum servicium Pro hac autem dimissione [et] concessione dederunt michi predicti Galfridus et Aubreda tres marcas et dimidia argenti premanibus In cuius rei testimonium presenti scripto cirograffato sigilla sua alternatim sunt apposita Hiis testibus domino Willelmo de Gadingham milite Iohanne de Watevile Petro filio Rogeri Willelmo Longhals Ricardo coco Waltero de Heuere Galfrido Algor Thoma clerico et aliis

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 6. British Academy. Oxford University Press. Oxford. 1982.