Sciant presentes et futuri quod ego Alexander filius Ricardi de London[] et Amicia uxor mea dedimus concessimus et hac presenti carta nostra confirmavimus Deo et beate Marie et sancto Iohanni Baptiste et fratribus hospitalis Ierusalem triginta et septem acras terre et dimidiam et unam acram et tres rodas prati et tres acras bosci cum pertinentiis in Bumstede Helyon[] quas recuperavimus ut ius nostrum coram dominis Nicholao de Turri Roberto de Brywes et sociis suis itinerantibus apud Chilmeresford[] ad festum sancte trinitatis anno regni regis Henrici filii regis Iohannis quadragesimo sexto habendam et tenendam totam predictam terram cum pertinentiis dictis domui et fratribus in eadem Deo servientibus in liberam et perpetuam elemosinam imperpetuum reddendo inde et faciendo capitalibus dominis tenementi illius redditus et servicia que inde singulis eorum de iure fieri solent et debent Et nos Alexander et Amicia terram predictam cum pertinentiis totam predictis domui et fratribus per predicta servicia contra omnes gentes imperpetuum defendemus et warantizabimus et heredes nostri warantizabunt Ut autem hec nostra donacio concessio et confirmacio rata et stabilis imperpetuum permaneat pro salute animarum nostrarum et antecessorum nostrorum eam presentis carte attestacione et sigillorum nostrorum apposicione roboravimus Hiis testibus domino Willelmo de Watevile domino Willelmo de Giffard[] Mauricio de Olmestede Galfrido de Weylewes Martino ad Montem Galfrido de Hamstede clerico Roberto de magna Chestreford[] capellano Iohanne de Dingelee clerico et aliis

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 6. British Academy. Oxford University Press. Oxford. 1982.