Notum sit omnibus ad quos presens scriptum peruenerit quod cum anno gratie millesimo ducentesimo quadragesimo nono mota esset controuersia inter dominum Adam abbatem et conuentum de Oseneya ex una parte et magistrum Iohannem de Bydeford et Randulfum Surdum de Oxonia ex altera super areragis et detentione redditus tenementi quod fuit quondam Willelmi de la Barre in parochia sancti Budoci in suburbio Oxon tandem controuersia in hunc modum amicabiliter conquieuit uidelicet quod dictus magister Iohannes cauit suffitienter iuramento corporaliter prestito quod nichil machinabitur nec consilium nec auxilium prestabit per se nec per suos uel per aliquem ex parte sua quominus ipsi Canonici si per legem terre et consuetudinem municipii Oxon terra de qua agitur deueniat in eschetam suam eam sic habeant libere et sine impedimento item quod non alienabit predictum tenementum aliquibus uiris religiosis seu priuatis personis nec onerabit siue debito Iudei siue Cristiani siue per edifitia sumptuosa et nimis onerosa quominus dicti Canonici ius suum et redditum et seruitium plene percipiant item quod ad redditum et seruitium terre scilicet decem et septem solidorum annuorum dictis Abbati et Conuentui debito modo in quatuor anni terminis uidelicet [...] fideliter reddendum obligauit se et assignatos suos et generaliter idem Iohannes obligauit omnia bona sua presentia et futura mobilia et immobilia et omnia laica tenementa sua in eadem uilla ubicunque sint et specialiter laicum tenementum suum uidelicet totam terram quam emit idem magister Iohannes de Radulfo de Notingham que est de feodo Iohannis le Plumer in parrochia sancte Marie Magdalene una cum tenemento illo quod habet in Haliwelle de feodo sancte Crucis de quo percipit xx solidos annuatim quod tenementum emit de Simone de Wynefeld ad distringendum per legem uille si aretro sit redditus uel seruitium Item obligauit se suffitienter quod si dicto modo fuerit districtus non pretendet obicem per priuilegium clericorum quominus distringantur utraque tenementa debito modo per namia Item tam magister Iohannes quam Randulfus predictus se obligauerunt quod nichil facient in preiuditium per aliquod factum suum per quod heredes tenementi exheredentur uel per quod capitales domini seruitio suo defraudentur Item de arreragiis redditus scilicet de viginti quinque solidis et nouem denariis dictus magister I satisfecit prefatis Abbati et conuentui suffitienter et memorandum quod magister Iohannes nichil in predicto tenemento habet nec habere clamat nisi per firmam decem et nouem annorum proximo sequentium post istam conuentionem Et in huius rei testimonium partes presenti scripto cyrographato inter eas diuiso sigilla sua altrinsecus apposuerunt Hiis testibus Willelmo de Limesy Ricardo de Hereford Iohanne de Winton Iohanne de Ouneby magistris Alexandro rectore ecclesie sancti Bodoci Petro filio Toraldi Laurentio filio Widonis Waltero de Oseneia Henrico Purcel Rogero de Suualecliue Thoma de Kidelingt et multis aliis

Source Fulltext: Cartulary of Oseney Abbey. H. E. Salter. Oxford Historical Society, V.90. Oxford Historical Society. Clarendon Press. Oxford. 1929.