G dei gracia Lundoniensis episcopus Philippo uicearchidiacono Oxenefordie salutem A domino papa mandatum suscepimus ut de causa que inter Abbatem et fratres de Oseneia et Priorem et canonicos sancte Frideswide diu agitata est super ecclesia sancte Marie Magdalene que extra portam Oxenefordie sita est ueritatem diligenter inquireremus et si constaret nobis iamdictos fratres de Oseneia a possessione memorate ecclesie sancte Marie Magdalene fuisse uiolenter eiectos ipsis omni occasione et appellatione remota eiusdem ecclesie possessionem restitueremus et causam postmodum audiendo eam mediante iusticia decideremus Huius auctoritate mandati statuto die partes euocauimus et ipsis coram nobis positis et eorumdem rationibus hinc inde plenius auditis supradictos fratres de Oseneia a possessione memorate ecclesie per uiolentiam eiectos fuisse idoneorum testium sufficienti probatione cognouimus et apostolici mandati formam sequentes ipsis eiusdem ecclesie possessionem adiudicauimus Quia uero quod in causa a iudice delegato statuitur id per ordinarium iudicem effectui recte mancipatur mandamus uobis et apostolica auctoritate iniungimus quatinus sepedictos fratres de Oseneia in corporalem eiusdem ecclesie possessionem auctoritate apostolica inducatis Et si quis uobis in hoc resistere aut aliquatenus impedire presumpserit uos in eum omni occasione et appellatione postposita ecclesiasticam exercere iusticiam non differatis et ecclesiam ipsam a diuinis cessare faciatis Uale

Source Fulltext: Cartulary of Oseney Abbey. H. E. Salter. Oxford Historical Society, V.90. Oxford Historical Society. Clarendon Press. Oxford. 1929.