T dei gracia Cantuariensis archiepiscopus episcopis abbatibus et ceteris sanctis ordinibus per Angliam constitutis salutem et benedictionem Sollicitudo ministerii nostri nos admonet ecclesiarum necessitudinibus prouidere ac aduersariorum incursibus resistere quatinus in ea pro uoluntate dei pax conformetur et tranquillitatis ope fideles ad omne opus bonum excitentur Hoc quidem intuitu ne ecclesia sancte Frideswide uirginis nunc uel futuris temporibus possessionum suarum dampna paciatur quecunque a uenerabili fratre nostro Rogero episcopo Saresberiensi eidem ecclesie donata sunt et iuxta tenorem carte ipsius reddita in perpetuum confirmamus auctoritate nobis a deo concessa prohibentes ne quis ea minuere siue in ius aliud abducere presumat Si quis uero ausu temerario hanc nostre confirmationis formulam sciens uiolare temptauerit et predictam donationem siue redditionem diminuere et in ius alienum abducere cupiditatis diabolice illectus obstinacia perpetuo anathematis uinculo constringatur et a corpore et sanguine Domini nostri Ihesu Cristi separetur quousque ad condignam satisfactionem uenerit et prefate ecclesie sua pro posse restituerit

Source Fulltext: Cartulary of Oseney Abbey. H. E. Salter. Oxford Historical Society, V.90. Oxford Historical Society. Clarendon Press. Oxford. 1929.