Anno domini mcclvi die sancte Agathe uirginis et martyris facta est hec conuencio inter abbatem et conuentum de Oseneya ex una parte et priorem et fratres de Monte Carmeli ex altera de assensu et uoluntate domini H dei gracia Lincolniensis episcopi loci diocesani uidelicet quod dicti abbas et conuentus concesserunt pro se et suis successoribus quod quiete et pacifice possint habitare in area illa quam dominus Nicholaus de Molis dedit eis in suburbio Oxonie iuxta Hospitale in Stockwellstret in parochia sancti Georgii in castro Oxonie quam ecclesiam habent iidem abbas et conuentus in proprios usus et in alia area proxima que fuit Nicholai de Stockwell cum parua dilatatione ad ingressum suum laxiorem faciendum in fronte uersus stratam publicam et quod possint in illa area oratorium erigere et diuina celebrare edificiis erectis et leuatis in fronte cum curtilagiis inter dictas areas et stratam regiam in statu quo fuerunt tempore conuentionis huius quoad dominium semper remanentibus Et si contingat dictos priorem et fratres de cetero terminos suos dilatare satisfacient competenter prefatis abbati et conuentui Oseneye pro rata portione habito respectu bonitatis et magnitudinis quoad dictas areas Dicti uero Prior et fratres pro se et suis successoribus inspectis sacrosanctis euangeliis in uerbo dei promiserunt quod parochianos abbatis et conuentus ad oblationes sepulturam nec ad aliqua sacramenta admittent uidelicet ad baptismum ad confessionem eucharistiam extremam unctionem matrimonium celebrandum nec ab eis recipient tritennalia nec annualia nec requesta nec aliquid aliud clam vel palam quod in eorum preiudicium uergere possit aut grauamen nisi de licentia dictorum abbatis et conuentus petita et obtenta Promiserunt etiam bona fide iidem fratres quod ecclesias dictorum abbatis et conuentus et vicarias omnes conseruabunt indempnes unde diebus festiuis infrascriptis uidelicet die Natalis Domini die Purificationis beate Marie uirginis die Pasche die sancti Georgii martyris duobus diebus festiuis sancti Thome martiris scilicet Translationis et Passionis die beate Marie Magdalene die assumptionis beate Marie die Omnium Sanctorum ante maiorem missam suam dicti fratres facient denuntiare in oratorio suo quod nullus parochianus dictorum abbatis et conuentus missam illam audiat in preiudicium et grauamen eorundem abbatis et conuentus Preterea quoniam prefati abbas et conuentus de dictis locis quasdam decimas et obuentiones percipere consueuerunt eo quod dicta loca ab antiquo de iure communi fuerunt sibi ratione dicte ecclesie sancti Georgii decimalia prenotati Prior et fratres procurauerunt assignari predictis abbati et conuentui redditum annuum et perpetuum decem solidorum in recompensationem pretermissarum decimarum et obuentionem Conuenit insuper inter dictas partes quod dictus Prior et sui successores qui pro tempore fuerint ad intimationem abbatis Oseneye qui pro tempore fuerit de quinquennio in quinquennium uenient apud Oseneyam et in presentia abbatis et dictorum Priorum recitabitur hec compositio et sub prestiti sacramenti forma ratificabitur ab eis Ad securitatem autem super his habend subiecerunt se dicti Prior et fratres iurisdictioni domini Lyncolniensis episcopi qui pro tempore fuerit quod possit eos compellere per censuram ecclesiasticam sine strepitu iudiciali ad omnia predicta fideliter obseruanda renunciantes omni exceptioni cauillacioni appellacioni et omni priuilegio impetrato uel impetrando et omni iuris remedio tam ciuilis quam canonici quod eis competere possit ad infirmandum seu impediendum conuentionem istam In cuius rei testimonium presenti scripto in modum chirographi confecto sigillum domini Lincolniensis episcopi appensum est una cum sigillo partium cuius una pars residet penes abbatem et conuentum Oseneye et altera pars penes dictum priorem et fratres de monte Carmeli

Source Fulltext: Cartulary of Oseney Abbey. H. E. Salter. Oxford Historical Society, V.90. Oxford Historical Society. Clarendon Press. Oxford. 1929.