Anno regni regis Henrici filii regis Iohannis quadragesimo primo ad festum apostolorum Petri et Pauli facta est hec conuentio inter dominum Ricardum abbatem et conuentum de Oseneya ex una parte et Willelmum de Foulewelle le Lingedraper ex altera uidelicet quod idem abbas et conuentus concesserunt dimiserunt et tradiderunt eidem Willelmo illud mesuagium cum pertinentiis suis in parochia sancti Thome Martiris quod Willelmus de Doddeford quondam inhabitauit tenend et habend dicto Willelmo et heredibus suis de se exeuntibus ad feodifirmam libere et quiete imperpetuum reddendo inde annuatim dicto abbati et conuentui et successoribus suis decem solidos esterlingorum ad quatuor anni terminos uidelicet ad festum sancti Michelis proximum sequens duos solidos et sex denarios ad Nathale Domini duos solidos et sex denarios ad festum sancte Marie in Martio duos solidos et sex denarios et ad festum sancti Iohannis Baptiste duos solidos et sex denarios pro omni seruitio et demanda salua eisdem abbati et conuentui et eorum successoribus secta curie sue apud Oseneyam cum necesse fuerit Quod si dictus Willelmus et heredes sui cessauerint a solutione dicti redditus in aliquo predictorum terminorum licebit procuratori dictorum abbatis et conuentus et eorum successoribus dictum mesuagium ingredi et namiare et distringere dictum Willelmum et heredes suos donec redditum qui aretro fuerit reciperint plenarie Idem uero Willelmus et heredes sui domos dicti mesuagii sumptibus suis sustentare debent omni tempore et ne corruant uel deteriorentur integras conseruare Quod si non fecerint licebit dicto procuratori prefatum mesuagium in manus dictorum abbatis et conuentus et eorum successorum saisiare donec per uisum legalium hominum restaurentur in statum pristinum Et si aliquod edifitium in dicto mesuagio contigerit eos construere non licebit eis illud ammouere Item non licebit dicto Willelmo uel heredibus suis prefatum mesuagium alicui Cristiano uel Iudeo uendere uel dare uel inuadiare uel aliquo modo obligare Idem uero Willelmus pro se et heredibus suis tactis sacrosanctis euangeliis iurauit se redditum predictum in prefatis terminis fideliter soluturum et suprascripta in omnibus obseruaturum Dicti uero abbas et conuentus et eorum successores prenominatum mesuagium cum pertinentiis dicto Willelmo et heredibus suis secundum quod predictum est per predictum redditum warantizabunt contra omnes gentes inperpetuum In huius rei testimonium partes presenti scripto in modum cyrographi confecto sigilla sua altrinsecus apposuerunt hiis testibus domino Nicholao de Henred tunc uicecomite Oxonie Willelmo de Mildecumbe clerico Nicholao de sancto Walerico Thoma le Teingturer Hugone molendinario Iohanne de la Stappe Willelmo molendinario Willelmo Wyting Iordano clerico et aliis

Source Fulltext: Cartulary of Oseney Abbey. H. E. Salter. Oxford Historical Society, V.90. Oxford Historical Society. Clarendon Press. Oxford. 1929.