Uniuersis sancte matris ecclesie filiis ad quos presens carta peruenerit R prior de Luffeld totusque eiusdem loci conuentus salutem in domino Ad uniuersitatis uestre noticiam uolumus peruenire nos unanimi assensu dedisse et concessisse deo et ecclesie sancte Marie de Egnesham et monachis ibidem [deo] seruientibus in puram et perpetuam elemosinam ad maiorem inter nostras domos dilectionem conseruandam decem solidos annuos in Westmolendino de Wlfrinton per manum molendinarii qui prefatum molendinum tenuerit ad hos terminos scilicet ad festum sancti Michaelis quinque solidos ad Annunciationem beate Marie quinque solidos illos uidelicet decem solidos quos nos percipere consueuimus ex eodem molendino ex donatione Willelmi filii Hamonis Predictum uero redditum decem solidorum predictis abbati et monachis Egneshamie et successoribus suis nos et successores nostri contra omnes homines warentizabimus in perpetuum Quod si forte non poterimus facere racionabile escambium ad ualenciam decem solidorum eis faciemus Quod si molendinarius qui molendinum illud tenuerit ad aliquem terminum a solucione cessauerit nos omni uexacione et dilacione remotis ipsorum indempnitatem in omnibus conseruantes redditum illius termini per nuncium abbatis siue conuentus qui nobis nunciauerit redditum non esse solutum eodem modo molendinario super hoc a nobis requisito ipsum redditum eis eodem die transmittemus Et si forte quia domus nostra uacauerit uel quia ipsum molendinum in alicuius custodiam deuenerit qui absens fuerit uel qui redditum ipsum die statuto soluere contradixerit nos cum ecclesia nostra rectorem habuerit quicquid restiterit soluendum de terminis elapsis ipsis integre persoluemus ita ut indempnitati eorum in omnibus sit plene consultum Et ut hec nostra donacio et concessio futuris temporibus rata et inconcussa perseueret eam presenti scripto in modum cirographi confecto et sigillorum nostrum apposicione roborauimus Hiis testibus etc

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.