Uniuersis sancte matris ecclesie filiis ad quos presens carta peruenerit I dei gracia abbas Egneshamie totusque eiusdem loci conuentus salutem in domino Ad uniuersitatis uestre noticiam uolumus peruenire quod cum mota esset questio inter nos ex una parte et priorem et conuentum de Luffeld ex altera coram de Wrockestan et de Ministre et de Northon[] prioribus iudicibus a domino papa delegatis super redditu x solidorum annuorum nobis a dictis priore et conuentu racione subiectionis aliquando debitorum partibus coram dictis iudicibus in iudicio constitutis lis sub hac forma conquieuit uidelicet quod nos unanimi assensu et consilio capituli nostri dictos decem solidos predictis priori et conuentui de Luffeld una cum omni accione quam erga eos habuimus uel aliquo tempore habere poterimus deum pre oculis habentes uisis eorum instrumentis penitus relaxauimus atque remisimus sub fide nostra firmiter promittentes quod neque nos neque aliquis successorum nostrorum nomine dicti redditus uel racione alicuius subiectionis aduersus eos uel eorum successores de cetero questionem mouebimus aut accionem intentabimus insuper adicientes sub eadem fide qua prius promittendo quod nos omnia instrumenta uel munimenta dictos priorem et conuentum de Luffelde contingentia eisdem fideliter restituemus Et si casu fortuito processu temporis aliquod instrumentum penes nos uel successores nostros fuerit repertum quod eos uel eorum successores contingit uel contingere posset id eisdem ut predictum est absque omni dilacione resignabimus Pro hac autem relaxacione [remissione] et quieta clamacione dederunt nobis dicti prior et conuentus de Luffeld x marcas argenti pre manibus Et ne a nobis uel successoribus nostris quod absit in irritum possit reuocari nos huic scripto signa nostra una cum signis dictorum iudicum apposuimus impetratis s[cilicet] et impetrandis obiectis et obiciendis et omni auxilio iuris tam ciuilis quam canonici renuntiantes Acta apud Egnesham anno gracie m cc xl in crastino sancti Gregorii Hiis testibus etc

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.