Omnibus [etc] I miseracione diuina abbas Egneshamie et eiusdem loci conuentus salutem in domino sempiternam Nouerit uniuersitas uestra quod cum inter nos super decima lane prouenientis de ouibus pascentibus in dominicali pastura de manerio de Ledecumbe Basset actores ex parte una et magistrum Steffanum rectorem ecclesie de eadem reum ex altera coram officiali domini archidiaconi Berkscire auctoritate ordinaria cognoscente suborta esset materia questionis tandem dicta questio de consensu nostro et uoluntate unanimi predicti rectoris in hunc modum conuenit uidelicet cum dictus magister Steffanus in dicta decima lane plene et dilucide ius nostrum recognosceret ac profiteretur prout in instrumento inde confecto plenius continetur nos eidem grata uicissitudine uolentes occurrere tenore presencium concedimus et promittimus quod super decima lane prouenientis de omnibus ouibus in parochia sua pascentibus quam percipere de iure consueuit porcione nostra quam percipere consueuimus et percipimus dumtaxat excepta nullam molestiam uel grauamen eidem uel alicui de suis in posterum faciemus seu fieri procurabimus Expensas quoque quas in lite fecimus dicto magistro gratanter remisimus et remittimus super hiis omnibus et singulis nichilominus renunciantes omni accioni excepcioni cauillacioni impetratis etiam omnibus et impetrandis et omni iuris remedio tam canonici quam ciuilis In cuius [etc] Datum Egneshamie quinto Idus Iunii anno domini m cc septuagesimo sexto

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.