Uniuersis [etc] Godefridus permissione diuina Wigorniensis episcopus salutem in domino Ihesu Christo Laudabilem in honestis et licitis uetustatem que iuxta iuris tramites utriusque pluries optinet uicem legis eo liberius tanquam racionabilem consuetudinem et prescriptam approbare ualemus quo ipsius obseruancia diuturna diuini cultus cessisse cedereque noscitur in augmentum creaturarum omnium creatorem summa religione colentibus perpetuis temporibus profutura Ex parte siquidem religiosorum uirorum abbatis et conuentus monasterii beate Marie de Egnesham Lincolniensis diocesis nobis extitit intimatum quod licet ipsi pensiones et decimas inferius annotatas a tempore cuius memoria non extitit in nostra diocese canonice percepissent munimenta tam super iure tituloque decimarum et pensionum huiusmodi concessa eisdem que apud simplicitatem antiquam poterant sufficiencia reputari per suptilitatem modernam penes interpretantes sinistre de facili ualerent in dubium forcitan reuocari Unde religiosi predicti nobis humiliter supplicarunt ut sibi super hoc curaremus salubre remedium adhibere Ob deuocionem igitur quam supradicti abbas et conuentus erga nos et nostram ecclesiam conceperunt uolentes eisdem graciam facere specialem defectus si quos ipsi in iure et possessione premissarum decimarum ac pensionum seu titulo paciantur auctoritate pontificali suplemus necnon pensiones et decimas easdem ipsis religiosis et successoribus eorundem in usus suos totaliter conuertendas confirmamus concedimus et donamus ne pretextu subtraccionis pensionum et decimarum ipsarum ministrorum obsequencium in monasterio prelibato statutus ab ipsius fundatoribus quod absit numerus minuatur Hee sunt pensiones et decime quas religiosi prefati in nostra diocese prelibata percipiunt et percipere consueuerant ab antiquo in suo uidelicet manerio de Mikeltone omnes decimas maiores de toto dominico suo et etiam uilenagio suo preterquam de una uirgata terre cuius decimam percipit loci rector idem autem percipit rector duas acras bladi in illis campis ubi carucarii abbatis percipiunt sua stipendia seu mercedem item percipiunt ipsi religiosi omnes decimas minores de curia sua proprioque instauro item percipiunt religiosi predicti decimas de tenementis suorum hominum liberorum et tenencium libere in manerio memorato preterquam de una hida terre quam tenet Ricardus de Cloptone in uilla de Mukeltone Percipiunt insuper et percipere consueuerunt ab antiquo religiosi premissi de ecclesia de Tettebiria quadraginta solidos sterlingorum annue pensionis Supradicta uero specialiter nominata et alia que de iure percipere consueuerunt ipsi religiosi ab ecclesiis prelibatis eisdem confirmamus concedimus et donauimus In cuius [etc]

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.