Vniuersis sancte matris ecclesie filiis ad quos presens scriptum peruenerit Philippus decanus et capitulum Lincolniensis ecclesie salutem in domino sempiternam Literas venerabilis patris domini Oliueri dei gracia Lincolniensis episcopi inspeximus in hec uerba vniuersis [etc] Oliuerus permissione diuina Lincolniensis episcopus salutem in omnium saluatore Nos qui ex debito pastoralis officii religiosorum omnium nobis subditorum prospicere tenemur vtilitati pariter et quieti dilectis in Christo filiis abbati et conuentui de Egnesham ex certis causis obligatos nos reputamus specialius in hac parte Hinc est quod cum iidem abbas et conuentus ecclesiam de Cherlebyri cum suis pertinenciis necnon et decimas quas in parochiis de Cherlebyri et Bannebyri solent percipere nostre ordinacioni pure sponte simpliciter et absolute per omnia submiserint prout in littera super eorum submissione confecta plenius continetur attendentes eorum indigenciam qua non satis sufficiunt eis ad sui sustentacionem et alia onera eisdem incumbencia bona sua temporalia quin necesse habeant pro suis supplendis necessitatibus nimis implicari secularibus occupationibus et per consequens a celestium contemplatione que a religiosis precipue requiratur plurimum impediri quodque de obuentionibus ad dictam ecclesiam de Cherlebyri spectantibus magnam perceperunt hactenus porcionem per quod uidebantur quasi secte obuentiones que uidentur potius vniende quod etiam certis considerationibus pro salute animarum et statu parochie de qua agitur in spiritualibus et temporalibus magis expedire videtur quod fiat appropriatio et vicaria competens ordinetur quam quod nomine rectoris proficiatur aliquis in eadem deum habentes pre oculis prefatam ecclesiam de Cherlebyri cum suis de Chadelyngtone et Schorthamptone capellis cuius esse noscuntur absque qualibet dubitatione patroni necnon cum omnibus suis iuribus et pertinentiis seu fructus prouentus et obuentiones eiusdem ecclesie qualescunque rectore ipsius factum nostrum huiusmodi approbante et plenius collaudante cedente uel decedente auctoritate pontificali concurrenteque concessu decani et capituli nostre Lincolniensis ecclesie prefatis abbati et conuentui ac monasterio suo concedimus et assignamus in vsus proprios perpetuo conuertend[a] salua portione congrua pro vicaria in ipsa ecclesia vna cum domo seu manso congruo pro nostro arbitrio ordinanda ordinamus insuper et diffinimus quod archidiacono Oxonie qui pro tempore fuerit pro commodo sequestri quod tempore vacacionum ipsius ecclesie percipere consueuit dimidiam marcam in festo Pasche annuatim soluere teneantur de decimis uero quas in parochia de Bannebyri impresentiarum percipiunt et hactenus pacifice perceperunt volumus et tenore presentium ordinamus quod earumdem gaudeant possessione quieta quousque ut premittitur ecclesie de Cherlebyri cedente uel decedente rectore ipsius ecclesie fructuum et obuentionum possessionem pacificam nacti fuerint et quietam qua adepta et optenta pacifice solis illis decimis sint contenti que de terris nostris dominicis in parochia de Bannebyri proueniunt nullam aliam decimam sibi uendicare in eadem parochia presumentes Omnes enim alias decimas eiusdem parochie ad ecclesiam de Bannebyri extunc pertinere uolumus et tenore presentium diffinimus vt sic ecclesie que in facultatibus a statu pristino multum decidit prospiciatur in tanto et sepedicti abbas et conuentus de statu suo securiores effecti litem minus timere valeant in futurum Premissa autem omnia sic ordinata intelligimus saluis episcopalibus consuetudinibus et Lincolniensis ecclesie dignitate In cuius rei testimonium sigillum nostrum presentibus est appensum Actum et datum apud Bannebyri duodecimo Kalendas Augusti anno domini m cc nonagesimo tercio Nos igitur huiusmodi ordinacionem dicti patris in omnibus premissis deliberatione preuia approbantes nostrum eidem unanimiter prebemus assensum saluis in omnibus Lincolniensis ecclesie iure et dignitate In cuius rei testimonium sigillum capituli nostri presentibus apponi fecimus Datum Lincolnie in capitulo nostro septimodecimo Kalendas Septembris anno domini m cc nonagesimo tercio Et memorandum quod Thomas tempore confectionis presentium abbas de Egnesham apposuit sigillum suum presentibus tunc penes capitulum ex liberatione sua remanentibus ut processu temporis de hoc facto nostro euidentius probatio habeatur Et sciendum est quod iidem abbas et conuentus habuerunt tunc dictam literam capituli de hoc facto duplicatam sub uno et eodem tenore

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.