Omnibus [etc] Thomas permissione diuina abbas Egnesham et eiusdem loci conuentus salutem in domino sempiternam Nouerit vniuersitas vestra nos concessisse et ad firmam dimisisse Willelmo filio et heredi Roberti Belegraue ad totam vitam suam piscariam nostram in Tamisia de Egnesham cum herbis in riparia crescentibus simul etiam et cum insulis subscriptis videlicet insula apud Godycrofteshamme insula iuxta gurgitem Willelmi de Puntle insula subtus le Wodewere insula annexa ad Halkwere ex parte australi duabus insulis coniunctis iuxta gurgitem Iohannis piscatoris insula annexa ad Forthwere duabus insulis coniunctis subtus Forthwere insula in medio passagii insula annexa ad Bolwere insula que vocatur Wythegeneham et tribus insulis in Standlake iuxta la Landmede pro triginta tribus solidis et quatuor denariis sterlingorum ad quatuor anni terminos pro equalibus porcionibus diuidendis nobis et successoribus nostris annuatim sine difficultate soluendis videlicet ad festum sancti Michaelis ad festum sancti Thome apostoli ad festum sancte Marie in Marcio et ad festum Natiuitatis sancti Iohannis Baptiste ita tamen quod non liceat predicto Willelmo dictam piscariam cum supradictis alicui dimittere seu alienare quocunque titulo seu colore sine voluntate et concensu nostro expresso Et si contingat dictum Willelmum in solucione triginta trium solidorum et quatuor denariorum aliquo termino vel terminis deficere liceat nobis et successoribus nostris ipsum in domo et extra domum per omnia catalla sua vbicunque fuerint inuenta distringere Predicto vero Willelmo in fata decedente dicta piscaria cum omnibus supradictis libere et sine contradiccione alicuius ad nos vel ad successores nostros integre reuertetur Et ad maiorem huius rei securitatem huic presenti scripto in modum cirographi diuiso sigilla nostra alternatim sunt appensa hiis testibus Iohanne de la Sale de Northleghe Roberto le Botiller Edmundo de Wodestoke Ricardo Bacoun Iohanne Morel et multis aliis Datum apud Egnesham die dominica proxima post festum sancti Thome apostoli anno regni regis Edwardi filii regis Henrici tricesimo primo

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.