Universis Christi fidelibus Walterus miseratione divina episcopus Norwicensis salutem in domino sempiternam Universati vestri volumus esse notum nos ad presentationem dilectorum in Christo filiorum prioris et conventus Norwic[] dilectum filium Warinum de Thestneton capellanum ad vicariam ecclesie de Wrthestede nostre dyocesis admisisse ipsumque vicarium in eadem canonice instituisse salvis in omnibus episcopalibus juribus et consuetudinibus et sancte Norwic[] ecclesie dignitate Consistit autem vicaria ipsa in uno manso juxta capellam sancti Andree in eadem villa continente in se unam acram terre et in omnibus ad alteragium dicte ecclesie spectantibus videlicet lino canabo et omnibus aliis minutis decimis et proventibus universis exceptis decimis molendini vel etiam molendinorum propriorum ipsorum prioris et conventus si contigerit ipsos molendinum vel molendina plura habere in eadem villa exceptis etiam fructibus terrarum quocumque genere bladi vel seminis seminatarum Salvis tamen vicario lino et canabo ut est prenotatum Insuper consistit vicaria ipsa in redditibus assisis ad dictam capellam sancti Andree spectantibus ac etiam oblationibus eiusdem capelle et proventibus universis Tamen si ob devotionem fidelium futuris temporibus quinque marcas argenti excedant oblationes et proventus capelle predicte tunc quicquid ultra fuerit dictis priori et conventui a vicario qui pro tempore fuerit in virtute juramenti prestiti fideliter persolventur Redditibus tamen predictis inter hec nullatenus computatis ac vicarius dicte ecclesie quicumque fuerit sustinebit omnia onera ad dictam ecclesiam contingentia debita videlicet et consueta Sustinebunt etiam dictam capellam tam in reparationibus capelle debitis quam in ornamentis eiusdem ac per capellanum idoneum eidem perpetuis temporibus in divinis honeste et reverenter faciet deserviri Que si non fecerit ac monitus per priorem et conventum predictos infra competentem terminum defectus tam reparationis capelle quam ornamentorum et servitii non suppleverit nomine pene dictis priori et conventui in viginti solidis argenti tenebitur eiusdem domus elemosinario persolvendis ad quos ac etiam ad alios defectus capelle quoscumque absque cause cognitione per episcopum loci qui pro tempore fuerit efficaciter compellatur In cuius rei testimonium huic scripto sigillum nostrum duximus apponendum Data Norwic[] octavo kalendas Augusti pontificatus nostri anno duodecimo et anno domini millesimo cc quinquagesimo sexto

Source Fulltext: Charters of Norwich Cathedral Priory. Barbara Dodwell. Pipe Roll Society, V.78, New Series V.40. Pipe Roll Society. J. W. Ruddock. London. 1974.