Wir Karle von gotes gnaden Romischer kunig zu allen ziten merer des riches und kunig zu Beheim. Enbieten den wisen luten dem burgermeister, dem schultheissen, dem rate und den burgern gemeinlichen zu Nuwenstad, unssern und des richs lieben getruwen, unsser gnade und alles gut. Durch den gunst, den wir zu uch tragen und auch durch soli- chen getruwen dinst, den ir uns und dem riche dicke und manigfalticlichen getan hant und noch furbasser getun mogent, so han wir uch von unsserm kuniglichen gewalte bestetiget und bewert sunderlichen und samenthafft alle uwere friheit, verlihungen, gnaden, recht und lobeliche gewonheit, die ir von uns und von andern fursten, Romischen keisern und kunigen, unssern vorfarn, biz her besessen gehabet und auch die ir bizher genossen hant. Und wollent, daz sie mit dirre schriffte ewecliche vestikeit haben sollent. Und des zu Urkunde so han wir diesen briff geheissen scriben und mit unsserm kuniglichen ingesiegel heissen bewern und besiegeln.

Der geben wart zu Spire, da man zalte von gotes geburte druzehen hundert iare und nun und virtzig iare, an dem nhesten dienstage nach unsser frauwen tage als sie geborn wart, in dem Vierden ¡are unssern riche.

Lehmann aus einem copialbuche auf pergament.