Nous Guis, cuens de Flandres et marchis de Namur, faisons savoir a tous ke nous avons rendu bien et loiament par le main Huon de le Wlstrate, nostre foyavle sergant, bourgois de Gant, a houmes religieus labbeit et le couvent del abbie de Dunes quatre bouniers dcus mesures et trente une verghes de muer a tout le treffons, gisant en le paroche de Hulst, ou liu con apiele Oeslmoere, de leis le terre ke on dist Sandbergli, cascun bounier pour seze livres de le monnoie de Flandres cest en soume sisante quinze livres quatre soles et quatre deniers de le dite mounoie dont nous nos tenons bien a paiiet en boine mon noie et bien contée des devant dis .. labbeit et le couvent et che muer devant dit a tout le treffons, proumetons nous a warandir a le devant dite abbie pour nous et pour nos hoirs, contes de Flandres, perpetuelment contre tous parmi sis deniers de cens par an de cascun bounier a paiier a nos bries de Hassenede a le saint-Remi cascun an et double cens toutes le fois ke li devant dis muers a tout le treffons ira de main en autre et quatre deniers pour mètre en nos bries le non de celui ki i enterra. Et pourchu ke nous volons ke ceste chose soit ferme et estavle et bien tenue as devant dis .. labbeit et le couvent del abbie de Dunes, avons nous ces présentes lettres saielees de nostre saiel, ki furent faites et dounes lan de grâce mil deus cent quatre vins et quinze, el mois de Jule.