Lucius episcopus, servus servorum Dei, dilectis filiis Willermo monasterii de Fonteneto ejusque fratribus tam presentibus quam futuris regularem vitam professis, in perpetuum1. Ad hoc universalis ecclesiae cura nobis a provisore omnium bonorum Deo commissa est, ut religiosas diligamus personas et beneplacentem Deo religionem studeamus modis omnibus propagare ; nec etiam2 Deo gratus aliquando famulatus impenditur, nisi ex caritatis radice procedens a puritate religionis fuerit conservatus. Eapropter, dilecti in Domino filii, vestris justis postulationibus clementer annuimus et3 prefatum beatae Dei genitricis Mariae monasterium, in quo divino mancipati estis obsequio, sub beati Petri et nostra protectione suscipimus et presentis scripti privilegio communimus. Statuentes ut quascumque possessiones quaecumque bona idem monasterium in presentiarum juste et canonice possidet aut in futurum concessione pontificum, largitione regum vel principum, oblatione fidelium seu aliis justis modis Deo propitio poterit adipisci, firma vobis vestrisque successoribus et illibata permaneant. In quibus haec propriis duximus exprimenda vocabulis locum ipsum videlicet ubi abbatia constructa est, cum omnibus appenditiis suis sicut a bonae memoriae Stephano Eduensi vobis religionis intuitu concessus est ; grangiam Carmeti cum appenditiis suis, usuaria terrae ipsius scilicet terras ad excolendum sine tertiis, pasturas animalium, pastionem pecorum, nemora ad edificandum et ardendum, aquas ad piscandum ; grangiam Flaciaci ex dono Rainardi domini Montis Barri, Aringias et Fontanas et usuaria in omni terra ejus, pasturas scilicet pecorum et pastionem porcorum, nemora ad 4 aedificandum et ardendum, terras ad excolendum sine tertiis, aquas ad piscandum ; grangiam Puteoli Franci ex dono Hugonis ducis, Guillelmi de Duismo , Roberti de Sarmasia , et Milonis fratris ejus ; grangiam Sancti Aniani. Sane laborum vestrorum quos propriis manibus aut sumptibus colitis, sive de nutrimentis vestrorum animalium, nullus omnino clericus vel laicus decimas a vobis exigere presumat. Decernimus ergo ut nulli omnino hominum liceat prefatum monasterium temere perturbare aut ejus possessiones aufferre vel ablatas retinere, minuere aut aliquibus vexationibus fatigare, sed omnia integra conserventur, eorum pro quorum gubernatione et sustentatione concessa sunt usibus omnimodis profutura, salva in omnibus apostolicae sedis aucthoritate. Si qua igitur in futurum ecclesiastica secularisve persona hanc nostrae constitutionis paginam sciens contra eam temere venire temptaverit, secundo tertiove commonita, si non satisfactione congrua emedaverit, potestatis honorisque sui dignitate careat reamque5 se divino judicio existere de perpetrata iniquitate cognoscat et a sacratissimo corpore ac sanguine Dei et domini redemptoris nostri Jesu Christi aliena fiat atque in extremo examine districtae ultioni subjaceat. Cunctis autem eidem loco justa servantibus sit pax Domini nostri Jesu Christi, quatinus et hic fructum bonae actionis percipiant et apud districtum judicem premia eternae pacis inveniant. Amen. Amen.

[Rota]6 7Sanctus Petrus, sanctus Paulus, Lucius papa secundus.

8Ostende nobis Domine misericordiam tuam

9 10Ego Lucius catholicae ecclesiae episcopus.

Ego Conradus Sabinensis episcopus.

Ego Theodeuvinus sanctae Rufinae episcopus.

Ego Albericus Ostiensis episcopus.

Ego Imarus Tusculanensis episcopus.

Ego Petrus Albanensis episcopus.

Ego Gregorius presbiter cardinalis tituli Calixti.

Ego Guido presbiter cardinalis tituli Sancti Crisogonii.

Ego Rainerius presbiter cardinalis tituli sanctae Priscae.

Ego Petrus presbiter cardinalis de titulo Pastoris.

Ego Hubaldus presbiter cardinalis tituli sanctae Praxedis.

Ego Guido presbiter cardinalis tituli sanctorum Laurentii et Damasi.

Ego Gregorius11 diaconus cardinalis sanctorum Cosmae et Damiani.

Ego Guido in Romana ecclesia altaris minister indignus.

Ego Johannes diaconus cardinalis sancti Adriani.

Ego Gregorius diaconus cardinalis Sancti Angeli.

Ego Astaldus diaconus cardinalis Sancti Eustachii juxta templum Agrippae.

Ego Johannes diaconus cardinalis sanctae Mariae Nove12 .

Datum Laterani per manum Baronis capellani et scriptoris13 , secundo14 calendas maii, indictione septima15, incarnationis dominicae [anno] 16 millesimo centesimo quadragesimo quarto17, pontificatus vero domini Lucii papae secundi18 anno primo19 .