C. In nomine sanctae et indiuiduae trinitatis. Heinricus diuina fauente clementia rex. Sanctae dei ecclesiae profectui tanto diligentius providere debemus, quanto excelsius ex diuino munere sublimati sumus. Quapropter omnibus Christi nostrique fidelibus tam futuris quam presentibus notum esse uolumus, qualiter nos Frisingensi ecclesiae in honorem sancte Marie sanctique Corbiniani constructae et consecratae ob petitionem ac interuentum Berthe reginae regni thorique nostri consortis dilectissimae instinctu quoque Epponis Niwenburgensis episcopi, Ekkiberti marchionis, Odalrici marchionis, nec non ob fidele meritum Ellenhardi eiusdem sedis episcopi, hasuillas Cubida, Lovnca, Ozpe, Razari, Trvscvlo, Steina, sancte Petre in pago Istria in marcha Odalrici marchionis sitas cum omnibus appendiciis suis hoc est utriusque sexus mancipiis, uineis, agris, pratis, campis, pascuis, siluis, uenationibus, forestis, forestariis, ecclesiis, areis edificiis, terris cultis et incultis, aquis aquarumue decursibus, molis, molendinis, piscationibus, exitibus et reditibus, uiis et inuiis, merkatis, theloneis, monetis, quaesitis et inquirendis omnique utilitate iu proprium dedimus, confirmauimus, perpetuo iure obtinendum concessimus, ea uidelicet ratione, ut nullus successorum nostrorum imperator siue rex, dux, marchio, comes aut alia maior uel minor persona iudicialis haec data prefatae ecclesiae auferre, alinare aut ullomodo presumat inquietare, sed prenominatus episcopus eiusque successores liberam inde potestatem habeant tenendi, pre˛cariandi, commutandi uel quicquid inde ad utilitatem eiusdem ecclesiae uoluerint faciendi. Et ut haec nostra regalis traditio stabilis et inconuulsa omni permaneat euo, hanc cartam scribi manuque propria corroborantes sigilli nostri impressione iussimus insigniri.||
Signum domni Heinrici (M.) quarti regis.||
Gregorius cancellarius uice Annonis archicancellarii recognoui.||
Data III. nonas Martii anno dominicae incarnationis M. LXVII., indictione V., anno autem ordinationis domni Heinrici quarti regis XII., regni vero XI. Actum Rätispone feliciter amen.

Source Fulltext: ZAHN, Codex Diplomaticus (=FRA II/31, Wien 1870) S. 84-85