Ego Hermanus comes de Ortenbureh, Gebhardus de Tolnz, Heinricus de Vagen (leerer Raum) vniuersis presens scriptum intuentibus et audituris cupimus fieri manifestum, videlicet quod C. venerabilis Frisingensis episcopus et dominus Wlfingus de Stubenberch communi accedente voluntate super controuersiis que idem Wlfingus dicto venerabili Frisingensi episcopo et Hainrico officiali suo de sancto Petro intulit et irrogauit, in nos tanquam in arbitros conpromiserunt in hunc modum, videlicet quod haberemus auctoritatem liberam decidendi controuersiam que uertitur inter eos, hac tamen adiecta pena, quod si quis illorum in nos conpromittencium nostro stare uel parere arbitrio recusaret, quod quidam qui tunc in conpromisso expressi nominati fuerant et qui adhuc nominabuntur dum necesse fuerit, per obstagium hoc est per alicuius ciuitatis uel alterius loci introitum tanto tempore artarentur, donec ad illorum exitum nostrum obseruantis arbitrium consensus accederet et voluntas. Cvm igitur per modum supra tactum habeamus inter memoratos arbitrandi liberam facultatem, tenor et series arbitrii nostri sit talis. Arbitramur igitur quod dominus Wlfingus de Stubenberch ante omnia relaxet Heinrico officiali de sancto Petro xxx marcas argenti, pro quibus persoluendis idem H. eidem W. (dedit) fideiussoriam cautionem et quod idem W. obligatus sibi per hunc modum fideiussores . . . . arceat et compellat, quod pro eisdem xxx marcis argenti memoratum H. officialem de cetero non impetuut, nec infestant (!). Arbitramur etiam quod supradictus W. prefato H. pro recompensacione suorum grauaminum et dampnorum conferat redditus v marcarum Frisacensis monete sitos infra Chez et Judenburch cum iure feudali absolute et libere sibi et suis heredibus possidendos. Pro offensis autem et grauaminibus abolendis in quantum hac in parte venerabilem Frisingensem episcopum respiciunt, inducias impetrauimus usque ad festum proximum beati Johannis baptiste tali adiecta condicione, vt idem W. medio tempore laboret modis omnibus apud sepe memoratum episcopum pro composicione amicabili et pro sue gracie plenitudine obtinenda. Verum si forte idem W. hac in parte inuentus fuerit negligens et remissus, tunc illi quorum supra reticentur nomina, sint ad penam subeundam quam supra expressimus, donec ad voluntatem obseruantis nostrum arbitrium obligati.

Source Fulltext: ZAHN, Codex Diplomaticus (=FRA II/31, Wien 1870) S. 142-143