Metuendo eorum domino et dilecto Ch. venerabili episcopo Frisingensi Wernherus, Chunradus et Jacobus fratres de Lok sui fideles et deuoti castellani fidele seruicium cum reuerentia et honore. Inmensas graciarum acciones vobis referimus pro eo quod vestra dominatio dignata fuit magistrum Heinricum vestre curie notarium ad partes Carniole dirigere ista vice, vt nobis omnes excessus nostros facie ad faciem obiceret quos in vobis et vestris hominibus exercere debuimus post recessum vestrum, et licet teste deo simus et fuerimus semper innocentes, quod vnquam confessi fuerimus coram domino duce Karinthie uel alibi, quod castrum vestrum Lok aut fuerit nostrum uel progenitorum nostrorum feodum, uel quod ius illud quod in wlgari chuppel et forstreht sonat, nobis attribuamus uel attribuerimus nobis unquam aut ascribere velimus nobis, uel quod illud vnquam confiteamur quod quilibet hominum vestrorum nobis debeat ducere saumam vini, et quamuis etiam super hiis omnibus incredibilibus nos proprium nostrum sacramentum expurgauerit, noluimus tamen carere quin etiam dominus noster dux Karinthie et eius consiliarii tanquam iurati coram prefato vestro notario nos laudabiliter expurgarent. Insuper inuocamus testimonium Jesu Christi, quod siqua dampna uel grauamina sunt vobis vel vestris hominibus illata per nostros homines, quod illa nunquam de mandato nostro uel voluntate nostra processerunt, immo doleremus medullitus si huiusmodi mala per nostros fierent seruientes, et siqua tacta sunt quod absit, illa non solummodo in vestri nuncii presencia immo etiam in aduentu vestro proximo volumus emendare atque semper vos pro domino nostro reuereri. Preterea treugas quas memoratus magister H. vestro nomine inter nos et officialem vestrum de Lok confirmauit, ratas et firmas volumus donec ad aduentum vestrum proximum obseruare atque alia omnia facere et procurare per que vester fauor et gratia circa nos augmentari poterit et per que vestra vtilitas et honor poterit procurari. Et in huius nostre expurgationis, innocentie et promissionis euidentiam et in confirmationem treugarum quas ad preces et mandatum vestrum officiali vestro de Lok usque ad proximum ad nos aduentum vestrum dedimus, non solum nostro sigillo verum etiam domini Ch. purkgrauii de Luentze et sepedicti magistri H. sigillis petiuimus roborari. Acta sunt hec apud Lok, anno domini M. CC. XXII., in octaua Pasche istis presentibus domino Ch. purkgrauio de Lu^entze, domino Alberto de Werdenburch, domino Jacobo de Gutenberch, domino Gebhardo de Gutenowe, domino Vlrico de Veizt pro parte nostra, pro parte aduersa Leonhardo, Rablino, Paumanno, Wernhero, Wulfingo, Walthero theloneario, sententiatore, nuncio, camerario, walputone et eius filiis et aliis quam plurimis ciuibus et scultetis.

Source Fulltext: ZAHN, Codex Diplomaticus (=FRA II/31, Wien 1870) S. 219-220