C. dei gracia Frisingensis episcopus. omnibus presens scriptum intuentibus salutem in omnium saluatore. Ad noticiam omnium quorum interest, cupimus peruenire, quod dilectus nobis magister H. canonicus sancti Andree nostre ciuitatis prothonotarius noster in presentia nostri constitutus magistrum Chunradum canonicum sancti Viti eiusdem ciuitatis capellanum nostrum exhibitorem presentium fecit, constituit sev ordinauit suum procuratorem in causa quam idem coram honorabili viro . . . . . . archidiacono Laybacensi iudice a sede apostolica delegato mouet seu mouere intendit super ecclesia sancti Petri Salzburgensis diocesis sita in fundo ecclesie nostre iuxta prouinciam sev districtum qui wlgo dicitur Longawe contra venerabilem in Christo fratrem dominum electum ecclesie Lauentine et vikarium ipsius ecclesie sancti Petri, dans sibi liberam potestatem et mandatum speciale pro se standi in iudicio, agendi, defendendi, respondendi, excipiendi, replicandi, libellum offerendi, litem contestandi, quodcumque genus iuramenti in animam suam prestandi, testes et instrumenta producendi, sententiam diffinitiuam audiendi, appellandi quociens et quando uiderit expedire, alium procuratorem pro se nomine suo in quacunque parte litis constituendi uel substituendi ipsumque reuocandi et omnia alia faciendi que potest ac debet facere verus et legittimus procurator, ratum habiturus sub ipoteca rerum suarum quicquid per eundem C. suum procuratorem constitutum uel substitutum ab eo suo nomine fuerit ordinatum, et hec omnibus quorum interest, uoluit esse nota. In horum euidentiam presens scriptum dictus magister H. nostri sigilli munimine et sui ipsius petiit roborari. Datum Wienne, III. idus Septembris, anno domini M. CC. LXII.

Source Fulltext: ZAHN, Codex Diplomaticus (=FRA II/31, Wien 1870) S. 225-226