Quod scripturarum confirmat auctoritas, improborum non potest improbitas infirmare. Proinde nos Otakarus dei gracia rex Bohemie, dux Austrie et Styrie marchioque Morauie scire volumus vniuersos presens scriptum inspecturos, quod cum inter dilectum dominum et amicum nostrum Chvnradum venerabilem Frisingensem episcopum ex vna et inter Marquardum Vlricum et Chvnradum fratres de Pilhdorf nostros ministeriales ex parte altera super advocatia in Enzistorf questio et controuersia uerteretur, ipso domino episcopo asserente quod felicis recordacionis dominus Chvnradus suus predecessor domino Friderico clare memorie tunc duce Austrie auctoritatem prestante, eandem advocatiam pro quingentis libris Wienensis monete de manibus Vlrici de Pilhdorf patris eorundem fratrum prouide extraxit, ita quod idem Vl. eandem aduocatiam in manus ipsius F. quondam ducis libere resignauit, adiciente etiam eodem domino episcopo quod postea nobis ducatum Austrie tenentibus dictus C. suus predecessor prefatis fratribus de Pilhdorf coram nobis in ivs vocatis probauit legittimis documentis, quod memoratus Vl. de Pilhdorf pater eorundem coram prelibato F. quondam duce publice fuerit protestatus se quingentas libras pro aduocatia in Enzistorf integraliter recepisse, prout hec omnia per autentica scripta tam domini F. quondam ducis quam nostra lucide apparebant, econtra sepedictis fratribus proponentibus, quod etsi pecunia memorata persoluta fuerit domino F. quondam duci, tamen ad manus patris eorundem aut etiam suas nichil unquam de peccunia huius peruenit, nec priuandi essent paterno feodo sine culpa. Ipsis inquam in hunc modum altercantibus placuit utrique partium ad consilium nostrum pro bono pacis eandem litem per compendium arbitrii terminari, et ab utraque parcium nobis presentibus in Ottonem de Missawe et Ottonem de Haselawe tamquam in veros arbitros extitit compromissum. Facta hinc inde securitate ydonea vteorum stetur arbitrio seu ordinationi, omni contradictionibus obstaculo penitus amputato, tam dicti arbitri in presencia nostri et testium infrascriptorum super negocio huius in eos compromisso sunt taliter arbitrati, quod sepefatus dominus C. Frisingensis episcopus Marquardo et suis fratribus de Pilhdorf ducentas libras Wiennensis monete persoluat idemque M. et eius fratres iuri feodali aduocatie in Enzistorf aliisve prediis ecclesie Frisingensis cedant et renuncient absolute. Hoc utique arbitrium taliter promulgatum per ratihabitonem partis utriusque extitit ilico confirmatum. Habita itaque cautione sufficienti de solucione ducentarum librarum prenominati fratres de Pilhdorf cesserunt (et) renunciarunt pro se et suis heredibus omni iuri ac feodo quod sibi in aduocatia in Encestorf aliisque prediis ac hominibus Frisingensis ecclesie vbicumque sitis aut etiam constitutis conpetere contendebant siue conpetere potuit eis de iure uel de facto quouis titulo, ea omnia et singula in manus nostras libere resignando. Nos etiam erga prelibatum dominum et amicum nostrum C. Frisingensem episcopum moti fauore et amicitica speciali illesa et integra conseruare deinceps promittimus et presentis scripti patrocinio renouamus omnia et singula que dominus F. quodam dux Austrie ad nutum et peticionem bone memorie C. Frisingensi episcopo de aduocatia in Enzistorf liberaliter et pie gessit ac statuit et que nos postmodum eiusdem C. precibus inclinati nostris scriptis meminimus roborasse, vt videlicet advocatia in Enzistorf aliorumque prediorum ecclesie Frisingensis per collacionem episcopi eiusdem loci in nos translata in Signum honoris pariter et laboris quem pro defensione ipsius loci et aliarum possessionum ac hominum pertinentium ad ipsam ecclesiam Frisingensem qui in terminis nostri sunt dominii constituti, (accipere debemus?,) contenti simus triginta talentis in Purificatione beate Virginis nobis et nichil amplius annis singulis persoluendis nosque nulli hominum viuenti uel victuro feodali titulo dictam aduocaciam conferre aliquatenus debeamus, adicientes nichilominus hanc penam quam etiam sepefatus F. quondam dux ab initio statuit sicut patet per suas litteras euidenter, vt si contra id nos vel heredes nostros uenire contingat, ipsam aduocatiam alienando titulo feodali, eadem ex tunc ipsofacto uacare debeat ecclesie Frisingensi. Vt autem hec que premissa sunt, debitum ac perpetuum robur obtineant firmitatis, ad peticionem memoratorum domini C. Frisingensis episcopi et fratrum de Pilhdorf presens scriptum conscribi fecimus et subscriptis testibus nostri sigilli et dictorum arbitrorum O. de Missawe et O. de Haselawe mvnimine insigniri. Huius rei testes sunt dominus Jerus, item dominus Zmielo de Lvhtenbvrk, item Gerizla Bohemi, item dominus (leerer Raum) purkrauius de Tewingen, item Rappoto de Valkenberch, item Wltingus et Otto fratres de Haselawe, item Heinricus de Liehtenstein, item Wernhardus et frater eius Hermannus de Wolhefstorf (!), item Otto camerarius de Perhtoltstorf, item Perhtoldus de Engelschachsvelde(!), item Albero de Arberk, item Heinricus dapifer de Gritsinstein, item Albertus pincerna et frater eius Lvdewicus de Celkingen, item Wernhardus dictus Prvzzel et alii quam plures. Datum in Iglavia per magistrum Arnoldum prothonotarium, XI. kal. Julii, anno domini M. CC. LXII., indictione quinta.

Source Fulltext: ZAHN, Codex Diplomaticus (=FRA II/31, Wien 1870) S. 221-223