In nomine patris et filii et spiritus sancti amen. Qvoniam ea que interdvm inter se agvnt homines, non solum subrepens eneruat obliuio, immo eadem quandoque solet hominum inconstantia infringere vel mutare auctrice que veritatis est emula leuitate, necesse est ergo quod illa que illibata conseruari debent, inperpetuum confirmentur lingva testium et testimonio litterarum. Proinde nos Vlricus, Marquardus et Chvnradus fratres de Pilhdorf notum facimus omnibus tam presentibus quam futuris, quod dvm super advocatia in Encinstorf quam ivre fevdali nos possidere contendebamus, inter dominum Chvnradum venerabilem episcopum Frisingensem et nos contentio suborta fuisset, placuit nobis et ipsi domino episcopo, in dominum Ottonem de Meissowe et dominum Ottonem de Haslowe tamquam in veros et legittimos arbitros compromittere vt talis contentio inter nos et ipsum dominum episcopum diutius agitata per illorum deberet arbitrivm feliciter terminari. Qui deliberato inter se consilio coram domino nostro karissimo Ottachero dei gratia illustri rege Boemie, duce Avstrie et Styrie marchioneque Moravie tale arbitrium in medium protulerunt, videlicet quod si nunc in proximo transacto beati Michahelis festo loco, vice ac nomine nostri domino Heinrico de Lihtenstein et domino Ottoni camerario de Berhtolstorf dictus dominus episcopus Frisingensis dvcentas libras Wiennensis monete persolueret et assignaret, nos tunc pro nobis metipsis et nostris heredibus vniuersis daremus eidem domino episcopo et suis successoribus priuilegia siue sub sigillis nostris patentes litteras in quibus renunciaremus omni iure (!) fevdali quod nos et nostri heredes habere in aduocatia Encinstorf uidebamur. Insuper hoc etiam fuit dicto arbitrio interclusum, si forte idem episcopus circa evndem terminum in danda nobis iam dicta pecunia inveniretur negligens et remissus, quod ex tvnc redditus xl librarum Wiennensium de possessionibus ecclesie Frisingensis nos et nostri heredes fevdali tytulo in perpetuum teneremus. Verum quia prefatus dominus episcopus Frisingensis tamquam uir procidus et circumspectus nunc in proximo transacto beati Michahelis festo nobis et dictis dominis qui ad hoc per arbitros deputati fuerant, dvcentas libras Wiennensis monete obtulit et assignauit, vnde nos ecce publice confitemur easdem dvcentas libras circa iam dictum terminum recepisse atque clamamus nos esse per ipsum dominum episcopum in omnibus et per omnia pagatos et solutos et in nullis aliis prorsus laudamentis et debitis ipsum dominum episcopum vel eius successores pro redemptione iuris advocatie in Encinstorf deinceps nobis sev nostris heredibus teneri, et propter hoc sub testimonio presentium ex nunc vsque in perpetuum nos pro nobis metipsis et pro vniuersis nostris heredibus non compulsi, non coacti sed libere, absolute ac publice omni ivri fevdali siue proprietario renunciamus quod nos vel nostri progenitores et heredes habere in prefata aduocatia Encinstorf videbamur, vel in omnibus prediis aliis adiacentibus atque villis. Ne igitur per nos vel nostros heredes vel per quempiam alium huiusmodi nostra resignatio et renuntiatio possit inpostervm infringi vel mutari, ad perhennem huius rei memoriam et in euidens nostre resignationis et renuntiationis testimonium memorato domino Chvnrado episcopo Frisingensi et eius successoribus presentem paginam tradidimus nostrorum sigillorum pendentium munimine roboratam, petentes subscriptorum testium habentes tunc penes se sigilla propria ad maioris roboris firmitatem huic etiam pagine applicari. Acta sunt hec Wienne in domo domini nostri Ottachari illustri^s regis Boemie, ducis Austrie et Styrie marchionisque Moravie, anno domini millesimo ducentesimo sexagesimo secundo, indictione quinta, sexto nonis Octobris, presentibus testibus subnotatis, Ortolfo abbate Medlicensi, Heinrico de Sevelde, Ottone de Meissow, Ottone de Haslawe iudicibus prouincialibus Austrie, Heinrico de Liehtenstein, Ottone camerario de Berhtolstorf, Wlvingo de Horssindorf, Alberto pincerna de Celking, Ludwico fratre eiusdem de Celking, Hermanno de Wolfkerstorf, Heinrico dapifero de Greicinstein, Wernhardo Prevzlone, Alberone de Schevrbach, Heinrico de Gottinsvelden, Ottone camerario de Walchvnschirchen, Berhtoldo Speismeister, Wolfkero de Chogel, Friderico magistro coquine de Porsenprunne, Wluingo de Haslowe, Dietrico de Chaluperg, Wernhero fratre Speismeister dominis et ministerialibus Austrie, Heinrico Vertingo, Vlrico de Lusnich, Raimbotone fratre eiusdem dominis et ministerialibus ecclesie Frisingensis, Otto de Foro, Chvnone magistro monete fratre eiusdem, Ottone filio Haimonis, Baltramo de Cimiterio, Rudgero iudice ciuibus Wiennensibus, Chvnrado notario coquine domini regis. Datum ex rogatu nostro per manum magistri H. de Lok tunc Frisingensis Curie notarii.

Source Fulltext: ZAHN, Codex Diplomaticus (=FRA II/31, Wien 1870) S. 228-230