Uictoriosissimo et excellenti domino suo R. dei gracia serenissimo rege Romanorum semper augusto F. permissione diuina sancte Salzburgensis ecclesie archiepiscopus apostolice sedis legatus cum debita reuerencia sinceram ad quelibet fidelia obsequia voluntatem. Sua nobis dilectus in Christo frater dominus Ch. venerabilis episcopus Frisingensis querimonia demonstrauit, quod nuper dum a vestra curia recedens versus partes superioris Austrie foret in ascensu, a quodam vestro iudice provinciali in via quasdam litteras recepit mandatum continentes vt proximo nunc celebraturo iudicio generali coram vestra regali presencia comparere debeat, Gozzoni ciui vestro de Chrems finaliter responsurus super quibusdam possessionibus quas idem dominus episcopus de consensu, voluntate ac rogatu ipsius Gozzonis et omnium eiusdem heredum prout in quodam publico instrumento exprimitur, comparauit. Vnde processum nostrum coram vestra celsitudine nuper Wienne habitum super celeri (!cleri) libertate vestris predecessoribus tradita et confirmata ad memoriam vestre regie magnificencie reuocamus, attencius exorantes quatenus vestra non paciatur magestas regalis, quod contra ecclesiastice libertatis priuilegium sicut prediximus, iam dudum obtentum prelibatus dominus episcopus et alii sui confratres cum eorum clero trahantur ad iudicium seculare, maxime cum iidem sint parati respondere coram nobis et nos simus etiam parati cuilibet querelanti de ipsis facere iusticie complementum.

Source Fulltext: ZAHN, Codex Diplomaticus (=FRA II/31, Wien 1870) S. 363-364