Fridericus dei gratia Salzpurgensis ecclesie archiepiscopus apostolice sedis legatus. Dilecto in Christo filio fratri Chvnrado priori monasterii Admontensis salutem in domino. Cum causa que super ecclesia in Probstorf inter dilectum in Christo filium magistrum Heinricum prepositum Werdensem ex vna parte et inter Johannem clericum de Praga pro plebano in eadem ecclesia se gerentem ex altera vertitur, fuerit per modum appellacionis ad nostram audienciam deuoluta et eandem dilecto in Christo filio Hertnido plebano de Pels archidiacono Karinthie iam dudum commiserimus terminandam, nec idem possit in illa procedere plurimis occupacionibus deditus et diuersis negociis occupatus, tibi vices nostras totaliter in hac causa duximus committendas, mandantes quatinus citatis partibus iuxta priora eiusdem archidiaconi acta iudiciorum in eadem causa mediante iusticia procedere non obmittas et eandem fine debito decidas, faciens quod decreueris per censuram ecclesiasticam firmiter obseruari, testes vero qui nominati fuerint, si se odio, amore uel timore subtraxerint, compellas veritati testimonium perhibere. Et si prelibatus magister Heinricus coram te aut per testes aut per alia documenta legitima suam intentionem probauerit, ipsum uel alium loco sui in possessionem memorate ecclesie in Probstorf per te uel per alium studeas inducere corporalem et inductum auctoritate nostra manvteneas et defendas, contradictores et rebelles censura consimili conpescendo. Datum apud monasterium Admontense, anno domini M. CC. LXX. VII., kal. Octobris.

Source Fulltext: ZAHN, Codex Diplomaticus (=FRA II/31, Wien 1870) S. 365-366