Fridericus dei gracia ecclesie Frisingensis episcopus. Vniuersis hanc paginam inspecturis presentibus ac posteris in perpetuum. Quoniam sine monimento litterarum stabilem sortiri non possunt acciones humane memoriam, ea propter huius scripti testimonio perenni cunctorum noticie duximus declarandum, quod cum serenissimus dominus noster Rudolfus rex Romanorum villas Probstorf, Vrvar et Schoenna quas quondam duces Austrie ab ecclesia nostra feodali tytulo noscebantur possidere, predecessori nostro bone memorie recompensacionis gracia pro certa pecunie summa pro dampnis in expedicione regia sibi factis et ex certis causis aliis obligasset, ex hac occasione mansi duo in Probstorf et vnus mansus in Schoenna quos monasterium in Lilienuelde fundatorum suorum beneficio sibi collatos vt dicitur, multis annis quiete tenuerat, sedis nostre fuissent dominio subiugati, nos tandem abbati et fratribus dicti monasterii super predictis tribus mansis aduersum nos querelantibus ob fauorem religionis cuius quieti pontificali sollicitudine debemus prospicere, prefatos tres mansos per formam composicionis amicabilis predicto monasterio de consensu nostri capituli in emphiteosis perpetuum contractum locauimus eo iure quod purchreht wlgariter nominatur, ecclesie nostre eorundem mansorum proprietate reseruata, ita quod de eisdem mansis nomine census decem et octo solidi denariorum Wiennensium nobis et successoribus nostris, in festo beati Michahelis novem et in festo beati Georii nouem annis singulis persoluantur, nec aliud quicquam nobis aut officialibus nostris nomine aduocacie aut pernoctacionis aut alterius cuiuslibet exactionis siue stevre coloni eorundem mansorum persoluere tenebuntur, nisi forte pro communi vtilitate sev defensione prediorum omnium ab eisdem villis aliqua fuerit contribucio facienda, immo sterilitatis aut bellorum tempore predicti coloni ea gaudebunt gracia quam colonis nostris ibidem in casibus similibus indulgemus. Judicio etiam prouinciali quod habemus in eisdem villis, predicti coloni et familia eorum iuxta sepedicti monasterii priuilegiorum continenciam subiacebunt, hoc apposito etiam et adiecto quod si prefati coloni in solucione pensionis desides fuerint vel remissi, ipsi vna cum possessionibus pretaxatis incident in penam iuxta terre consuetudinem et iudicum nostrorum sentenciam approbatam. Vt autem hec omnia perpetue robur obtineant firmitatis, placuit nobis presentes litteras nostri et capituli Frisingensis, necnon abbatis sev conuentus in Lilinvelde sigillorum munimine roborari. Acta sunt hec presentibus testibus subnotatis, Heinrico tum preposito Frisingensi, Heinrico preposito Werdensi, Hermanno preposito Ardacensi, Chunrado preposito Intycensi, Liupoldo plebano de Enzinstorf. Ottone de Waldekke, Dietmare dicto Litenner, Heinrico de Enzinstorf militibus et ministerialibus ecclesie, Alberto de Vihdorf, Chunrado iudice de Enzinstorf et aliis quampluribus fidedignis. Datum Wienne, anno domini millesimo ducentesimo octogesimo primo, XIII. kalendas Junii. Pro maioris autem cautele prouidencia poni voluimus duorum de Runa et de Welherat Cysterciensis ordinis abbatum. sigilla cum nominibus fratrum de monasterio Lilinvelde Ludwici prioris, Herwici senioris, Friderici sacriste, Gundoldi camerarii et Stephani cellerarii.

Source Fulltext: ZAHN, Codex Diplomaticus (=FRA II/31, Wien 1870) S. 394-395