Actiones hominum temporales propter vite breuitatem, diuersitatem actuum et labilem humani capitis memoriam obliuionis plerumque scrupulo intricantur, nisi scripturarum perhenni robore solidentur. Hinc est quod nos Emcho dei gracia Frisingensis ecclesie episcopus tenore praesencium profitemur et ad noticiam singulorum volumus peruenire, quod nos tria feoda prope Jaistorf quod wlgo dicitur in der Planitzen, et vnum in Grillenperge que per mortem Erchengeri de Judenburch, item vnum feodum an dem Stalbavm, quod per mortem Eberhardi clerici, item aliud feodum ibidem Ottonis de Holtze, item vnum feodum in Veustricz quod per mortem domini de Trewensteyne, item in der Polan duas hubas et vnam in Rotenmanne, vnam in Reivnich et vnam in Hinterekke an der Gazzen que per mortem Ch. de Judenbwrch nobis et ecclesie Frisingensi vacare ceperunt et ad manus et collacionem nostram libere sunt reuersa, ad instanciam et peticionem dilecti et specialis amici nostri honorabilis viri domini H. venerabilis abbatis Admvntensis, necnon occasione cuiusdam summe peccunie, videlicet lxx marcarum argenti in quibus Vlricus et H. fratres filii sororis predicti domini abbatis nobis complacere studuervnt, cum omnibus suis attinenciis predictis Vlr. et H. contulimus iure ac titulo feodali. Huius quoque collacionis sev infeodacionis dominum et auctorem quod wlgo dicitur gwer, nos esse profitemur in omnibus que sunt iuris. Sane quia predicti Vlr. et H. super quibusdam predictorum feodorum, videlicet Grillenperg, Reivnich, et Hinterekk nobis et sibi timebant moueri aliquam questionem, taliter ipsis cauere duximus in hac parte, quod si predicte feoda per nos aut procuratores nostros in iure defensa non fuerint et obtenta, nos eadem feoda predictis Vl. et H. recompensare tenebimur cum aliis equalentibus (!) feodis quamprimum nobis vacare ceperit (!) in hofmarchia nostra Welcz aut sancto Petro sev alias vbi videbitur expedire. Et ne super hoc imposterum aliqua recidiue questionis oriatur contencio, presens instrumentum ipsis H. et Vl. assignauimus nostri sigilli munimine roboratum. Datum aput Welcz, anno domini M. CC. LXXX. quinto, III. idus Aprilis.

Source Fulltext: ZAHN, Codex Diplomaticus (=FRA II/31, Wien 1870) S. 425-426