Ich Hainrich Hueglinger auz der Wachawe vergihe an disem brief allen den die in sehent oder hoerent lesen, daz ich meinem lieben herren dem ersamen bischof Emchn von Frisingen gehaizzen han vnd gehaizze, daz ich vmb sogetan rihtigvnge vnd ich mit im veber ain chomen bin vmb ein vaz weines in der Wachowe auz der Alttach dar nach ich ansprache het, in meines hern Leutoldes von Kvenringe offen brief antwurte vnd gewinne, dar an vnd vnder sinem insigl ich mich verzeihe allez des rehts des ich vnd mein erben an der selben ansprache haben oder moehten haben gehabt, vnde schaffe auch, wan ich mich des vorgeschriben meines rechtes in sein hant verzigen han, daz sich alle mein erben, swenne ich si schierste zv dem vorgenanten meinem herren bringen mach von Frisingen, auch dar auf verzeihen ires rehtes, vnd swelh ansprach in oder sein gotshaus ze Frisingen fuerbaz dar vmb an get, daz ich sin oder seines nachomen gewer bin mit swelhem oder vor swelhem reht ich daz tun sol, vnd dar vber gib ich im disen brief mit Alrames meines geswein, rihters ze Amstetten insigl versigelten, wan ich selb niht insigels het. Der ist geben ze Vdmaruelt, des Vreitages vor sant Marteinstag da von Christes geburtte waren tusend iar, zweihundert iar, in dem siben vnd nivntzigistem iar.

Source Fulltext: ZAHN, Codex Diplomaticus (=FRA II/31, Wien 1870) S. 460-461