Wir Chunrat von gotes genaden aptt datz Seitensteten vnd div sammenung des selben goteshauses tun chunt allen den di nv sint vnd her nach chunftich werdent, daz wir mit gemainem willen Perhten vnd Sweimu^oten, Ortolfes des Flusthartes toehtern gelihen haben zir tagen vnd ze ir beider leiben den cehent vf dem Purchvelde ze Waidhoven den Hainrich Engelschalch von vnserm gotshause het, mit der bescheidenheit, daz si alle iar vns vnd vnserm goteshaus da von schuln geben ze cinse an Vnser vrauen tag ze Lihtmesse drizzig phenning vnd swenne di vorgenanten leibe beide tod geligent, so ist der vorgenant cehent an aller ir erben vnd nachomen widerred vns vnd vnserm goteshaus ledich. Dar vber hab wir in gegeben disen prief ze einem vrchuend gevestet mit vnsern insigeln. Des sint gezevg her Engelschalch der prior vnd her Otte der guster, her Heinrich von den Winden, Herman der Nevnberger, Alram der Stiller, Wolfher der Flusthart, Gotfrit sin sun, Ditmar vnd Heinrich Cho^el vnd ander biderb levte. Daz ist geschehen do von Christes gepuert waren tausent iar vnd driv hundert iar, nach (!) dem Perhtentage.

Source Fulltext: ZAHN, Codex Diplomaticus (=FRA II/35, Wien 1871) S. 2-3