Ich Offe von Lantstrost vergihe mit disem brief vnd tun chvnt allen den die yn sehent oder horent lesen, daz ich meinem genadigen herren herm Emchen dem ersamen bischof von Freising vnd seinem gotshaus ze Freisingen verkauft vnd gegeben han ze Tal zehen hu^oben vnd achtzich emmer weyns die man mir da gebn sol ze perchrehte, vnd ze Prieglach vnd ze Gesiez zehen hu^obe oder mer, vnd swas ich da selben han daz han ich von meinem herrn dem bischof vnd von seinem gotshaus ze Freising vntz her ze rehtem lehen gehabet vnd han es nv alles sampt, walt, forst, waide, akcher, wismat, gepawen vnd vnerpawen, stok vnd stayn vnd allez daz ich da selben han, swie daz genant ist, besu^ocht vnd vnbesu^ocht, la\evt vnd gu^ot, daz han ich allez mit ein ander meinem vorgenanten herren dem bischofe vnd seinem gotshaus ze Freising verchauffet vnd gegeben vmb achtzich march Aglayer phenning vnd han der selben phenning ein genomen achtzehen march vnd sol mein herr der bischof die veberigen zwo vnd sechtzich march Aglayer phenning geben Gebhart dem Presinger vor sant Ge^orgen taeh der nv schierst chvmpt, vnd ist daz ich daz selbe gu^ot vmb die selben achtzich march wider chauffen wil vnd mak von sant Ge^orgen tak der nv schierst chvmpt, veber ein jar, dez sol mir mein herr der bischof oder sein nachchomen stat tu^on vnd sol mir daz selbe gu^ot ze rechtem lehen wider leihen yn allen dem rechte als ich ez von im vnd von seinem gotshaus han gehabt vncz her, vnd sol auch ich denne die selben achtzich march meinem vorgenanten herrn dem bischof oder seinen nachchomen oder seinem Schreiber der denne sein Schreiber oder seyn phleger ze Lok ist, widerantburten ze Lok yn der burch mit gu^oter gewizzen. Ist aber daz ich daz selbe gu^ot vmbe die vorgenanten achtzich march in der vorgenanten frist nicht widerchauffe, so schol daz vorgenant, laevt vnd gu^ot, allez mit ein ander meinem vorgenanten herren dem bischof vnd dem gotshaus ze Freisinge von mir vnd von allen meinen erben ledich seyn vnd sol ym ebichleichen beleiben vnd sol ich weder ich noch dehayn meyn erbe dar nach dehayn ansprache nymmermer gewinnen, doch sol meyn vorgenanter herre der bischof oder seyn nachchomen nach dem vorgenanten zil so ym daz gu^ot gar veruallet, mir geben v^eber die vorgenanten achtzich march swaz mir Berchtolt von Rautenberch vnd Ott von Sicherstayn haizzent geben, vnd hiezzen sie mir nichts nicht geben, so sol meyn herre der bischof vnd das gotshaus ze Freising ledich sein vnd sol yn dannoch daz gu^ot beleiben alz hie vor verschriben ist, vnd sol auch ich vnd meyn erben des vorgenanten laevt vnd guetes vberal, ob vil leicht meinen herren den bischof vnd seine nachchomen vnd daz gotshaus ze Freising notrede oder ansprache dar vmbe an geat, seyn gewer seyn alz eyn man lehenes gewaer ze recht sol sein vnd als dez lands reht ist. Vnd darvber gibe ich meinem vorgenanten herren dem bischof vnd dem gotshause ze Freising disen brief versigelten mit meinem hangendem insigel ze ainer bestatigung diser sache, vnd bei disem gewerfft ist gewesen vnd sint auch gezevgen mein herre graf Emch probst ze Wertse, herr Berchtolt von Gebolspach probst ze Inichingen, herr Wolfhart von Roehling chorherren ze Freising vnd her Chv^onrat der ritter von Lok, her Berchtolt von Rauetenberch vnd Jacob der Zaeppel von Chraynburch vnd Ott von Sicherstayn vnd Dyetrich der Prenner von Lok vnd ander erbear laeut. Der brief ist geben ze Gutenwerde vnd ist auch der selbe gewerfte da geschehen da man zalt von Christes gebu^orte drevzehen hvndert iar, dar nach yn dem sechsten yar, des Samptztags nah dem Perichttage.

Source Fulltext: ZAHN, Codex Diplomaticus (=FRA II/35, Wien 1871) S. 24-26