Ich Wolfger vnd ich Hainreich sein pruder, hern Wolfgers svn von Wogram des wirtes, veriehn offenlich an dism brif, daz wir mit vnserm herren von Frisingen bischof Chvnraten bericht sein vmb di ansprach vnd daz gelub daz er gen vns vnd vnsern geswistriden gehabt hat, also beschaidenlich daz wir im gebn schullen fvmfvndvirczk pfunt alter Winner pfenning der wir in halber weren vnd richten schullen ze Weihnachten vnd halber pfenning des Svnntags so man vier tag geuastet hat, vnd seczen im da fu^er ze purgeln vnser lieb frevnt hern Ditreichn von Egendorf, hern Ortlibn den Teusenperger, Lebn vnd Chvnter (!) di druchsaeczen von Vczestorf, vnd ze swelchm genanten tag wir im der vorgnanten pfening niht werten, so schullen di egenanten purgel dacz Holnburch in varen do man si haizzet, vnd laisten auf vns als gewonhait ist ie der man selb ander mit zwain pferften (!) als lang vncz er gericht wirdet, vnd schullen di purgel lesen an alln iren schaden. Des gebn wir disn brif versiglten mit vnsern insigeln. Der brif ist gegebn ze Holnburch do man zalt von Christi gepurd dreuzehn hvndert iar, dar nah in dem dreizkistem iar, an dem heiligen Pfingest tag vnsers herren Jesu Christi.

Source Fulltext: ZAHN, Codex Diplomaticus (=FRA II/35, Wien 1871) S. 182-183