Wir Heinrich von gots gnaden chunig ze Behaim vnd ze Polan, hertzog in Chernden vnd graf ze Tyrol, veriehen mit disem prief, daz wir an gesehen haben die twanchsal vnd beschedigunge die di Chorherren von Freysingen an ir gelt vnd gu^oten oft vnpillich leident vnd haben in von sundern gnaden vnd ze vo^erderist durch dez rechten willen die gnade getan, daz in vnserer herschaft dh(ain) paw^eman der ir gu^ot pawet, dez selben gu^otes weder gar noch einen tayl, swi daz gu^ot gnant sei, nicht ane an ir hant mu^eg noch sol werden in dheiner hand weis; weder mit verchauffen, noch mit versetzen, ze zilon, noch ze jarn, vnd swa daz (immer) beschehen oder noch beschaehe, wellen wir daz daz weder chraft noch mach(t habe) vnd gepieten allen vnsern richtern vnd amptlewten den diser prief bezeigt (wirt, d)az si die vorgenanten chorherren von der gnad schermen vnd behalten vnd ins nieman vberuarn lazzen werden. Mit vrchunde diczes priefs der ist (gebe)n ze Insprug do man zalt von Christs gepurt driuzehen hundert (iar), dar nach in dem ain vnd dreizzigistn iar, des Phincztags vor sand Nyclaws.

Source Fulltext: ZAHN, Codex Diplomaticus (=FRA II/35, Wien 1871) S. 191