Ich Seyfrid der Hürnein vergihe offenlich an disem brief vnd tu^on chunt allen den die in ansehent oder hoerent lesen, daz ich mit wol verdahtem mu^ot ze den zeiten do ich ez wol getu^on mocht, durch besunder liebe vnd andaht die ich han zu^o Vnser vrowen vnd zu irem gotshaus ze Freisingen, des Weisen aigen, Stephans aigen auf dem Snayntz, der Poschinn aigen, Gotschalkches aigen in der Gru^ob, die hofmarch auf dem Puehel vnd des smydes aigen datz Aetzleinstorf dev rechtes aigen sint vnd dev ich gechoufet han vmb mein aigen gu^ot fu^er mich selb, fuer mein hausfrowen vnd fuer alle vnser paider erben, han auf geben meinem erwirdigen herren bischof Chuenraten von Freisingen vnd seinem gotshaus ze Freisingen, also daz er vnd sein nach chomen dev vorgenanten guter ewikchleich suellen leihen, vnd han ouch ich dev selben gueter vnd owh daz aigen auf dem Puehel ze A\etzleinstorf daz ich vnd mein vordern von dem gotshaus ze Freisingen e maln ze lehen haben gehabt, mir vnd Adelhaiten meiner hausfrowen vnd allen vnser paider chinden dev wir ,nu haben oder noch mit ain ander gewinnen, von meinem egenanten herren bischof Chuenraten von Freisingen vnd von seinem gotshaus empfangen ze rechtem lehen. Vnd dar veber ze ainem vrchuend gib ich in disen brief versigelt mit meinem anhangendem insigel. Der brief ist geben ze Waidhouen do man zalt von Christes gebuert drevtzehen hundert jar vnd dar nach in dem siben vnd dreizzigistem jar, an dem nahsten Freitag vor sant Barthlomeus tag.

Source Fulltext: ZAHN, Codex Diplomaticus (=FRA II/35, Wien 1871) S. 255