Wir Chunrat von gots gnaden bischof ze Freisingen veriehen mit disem brief offenlich vnd tuen kunt allen den die in sehent oder horent lesen, daz wier mit vnserm guetem willen die genad getan haben Chuendlein Otachers seligen tahter von Miesperg vnd haben ez geweiset auf den zehent auf Hainreichs des Grazwinchler lehen ze Miesperg daz ez ab dem selben lehen den meraren zehent niezzen schol vnd inne haben ze seinen lebtagen vnd niht fuerbaz, vnd waer daz wier ald vnser nachomen im sechs phunt phenning gaben, so schol ez von dem egenanten zehent gesten vnd dar auf nimmer mer dhain reht iehen noch haben hintz vns noch hintz vnserm gotshaus ze Freisingen noch hintz demselben lehen vnd zehenten, wan vns daz selb lehen vnd zehent gantzleich veruallen was vnd ledichleich von egenantem Chundlein vater vnd ierer geswisterod, also daz si dhain reht dar auf hat noch enhet, an daz wir im daz von sundern genaden getan haben das ez den vorgenanten merarn zehenten niezzen schol ze seinen lebtagen vnd niht furbaz. Dar vber ze .einem vrchund geben wir dem egenanten Chundlen disen offen brief mit vnserm hangunden insigel besigelten. Der brief ist geben ze Vdmaruelt des iars du man zalt von Christs gepuerd dreuzehen hundert iar vnd in dem siben vnd dreizgistem iar, des Freitags vor sand Jacobs tag.

Source Fulltext: ZAHN, Codex Diplomaticus (=FRA II/35, Wien 1871) S. 252-253