Allen den die disen brief an sehent oder hoerent lesen chunde ich Hainr. der Roetel, phleger des erenwirdigen herren byschof Chu^onrats ze Freysing vnd amptman zu^o den selben zeiten zu Haberberch vnd des vrbars ze Iniching vnd vergich offenleich mit disem brief, daz ich verleich vnd han verlihen dem beschaiden manne Chu^ontzen hern Weygleyns svn dem got genad, zu ainem rechten cynslehen ain vyertayl daz gelegen ist dacz Iniching, besu^ocht vnd vnpeschu^ot (!), mit allen den rechten die dar czu^o gehoerent vnd nu^oczen von recht oder von gewonhait, daz vor gehabt hat der egenant Weygel vnd sein wyrtin frawe Gattrey des egenanten Chu^onrats vater vnd mueter, vnd han im daz vorgenant vyertail genczleich verlihen vnd also, daz er jaerichleich geben sol den cyns der da von gehoert als von andern vyertailn au^of der hofmarch ze Iniching in meins vorgenanten herren chasten ze Haberberch wer denne amptman ist, vnd wand ich vollen gewalt han ze peseczen vnd entseczen daz guet vnd ander guet die des gotshavs sind von Freysing. Vnd daz im daz staet vnd vnczebrochen peleib, dar vber gib ich im disen offen brief mit meinem anhangundem insygel zu^o ainem vrchund der warhait. Der sache sint geczeuge her Berchtolt der Porger chorherre ze Iniching vnd her V^olr. ab Taessenperch der auch choerherre da ist, vnd her Chu^onr. der Speczingerin svn vnd der erber man Berchtolt Cholbech vnd Gebhart chamrer, V^olr. der Posch vnd Pertel der schreiber vnd Veydel der Geud vnd Nykla der zolner vnd ander erber leut. Dicz ist geschehen do man zalt von Christes gepurd ergangen warn tau^osent vnd driw hundert iar vnd darnach in dem neun vnd dreizzigisten jar, an Vnser vrauwen abent Assumpcionis.

Source Fulltext: ZAHN, Codex Diplomaticus (=FRA II/35, Wien 1871) S. 270-271