Nos frater Leupoldus dictus abbas et conuentus monasterii Campililiorum notum facimus presencium inspectoribus vniuersis quod animo deliberato et communi omnium beneplacente conniuencia ob remedium ac salubrem memoriam anime reuerendi patris et domini karissimi domini Chunradi ecclesie Frisingensis venerabilis episcopi nobiscum sepulti, ne beneficiorum ipsius videamur inmemores et ingrati, de redditibus nostri monasterii segregauimus duodecim solidos denariorum annalium reddituum ex quibus de curia in dem Stocheich (!) iuxta Hainueld quinque solidi et de alia curia vbi Woph residet, quinque solidi et de area auf der Stetten sexaginta denarii in beati Martini festo annis singulis seruiuntur, eosque nostro custodi quicunque fuerit, assignantes, ita tamen ut idem custos dictos redditus solummodo colligat sed in ipsis bonis et hominibus nullam in aliquo debeat sibi iurisdictionem penitus vsurpare, prescriptum remedium taliter declarando quod antedictus noster custos de vno talento predictorum reddituum debet habere vnam perseuerantem die et nocte lampadem perpetuo et ardentem que lampas coniuncta est lampadi ordinis summi altaris, ita quod si eadem ordinis lampas nocturno tempore ad chori medium propter fratrum presenciam translata fuerit, episcopalis tamen lampas iugiter et immobilis ardeat suo loco. Qui eciam custos in die anniuersaria prefati patris sedecim candelas iuxta sepulchrum eius incensas ad missam et vigilias ordinabit, quatenus per hoc ipsius nobiscum recencior habeatur (memoria). Insuper antefatus custos de medio talento reddituum residuo perpetuum lampadis lumen nocturnum altari beate Margarethe virginis ordinabit et nichilominus duo talenta cere prefato altari in eiusdem virginis festo sepositis excusacionibus omnibus annis singulis ministrabit. Vt autem hec omnia et singula perpetuo maneant inconuulsa, nostra sigilla videlicet abbatis et conuentus presentibus sunt appensa. Datum anno millesimo trecentesimo XL. secundo, in Dominica Inuocauit.

Source Fulltext: ZAHN, Codex Diplomaticus (=FRA II/35, Wien 1871) S. 280-281