Nous Guis cuens de Flauders et marchis de Namur faisons savoir a tous qui est bien nos greis et nos volenteis que Xpristiens li brabantres, nos baillius de Furnes vende et fache werp souffisaument bien et a loy al abbeit et au couvent de S. Nicolai de Furnes de trois mesures de terre pau plus v mains gisans dedens leschevinage de Furnes, et que li dit abbes et convens en soient ahiriteit pour lor eglise souffissaument bien et a loy, et li dis Xprystiens et se feme desheriteit sanne no droiture, et le droiture dautrui, et que le dite terre demuere paiauble toutes les droitures et justichaule a nous et a nos hoirs parpetuelement et a tous- jours, par le tiesmoigny de ces lettres seelees de no saiel faites et donnees a Winendale, en lan de grace m cc quatre vins et quinze, le semmedi après le division des aposteles.