(Dobrakucha, nr. 33.) In nomine domini. Amen. Anno nativitatis domini millesimo quadringentesimo septuagesimo quarto. Ego Katherina, relicta condam nobilis Gregorii alio nomine vocato Herih de Zeyanahrazthya in lecto egritudinis, corpore licet eger, mente tamen per omnia sana, de bonis michi a deo collatis talem meum ultimum facio testamentum. Item primo animam meam recommendo in sinum Abrache, in quo Lazarus requiescens vidit divitem epulonem in tormentis anxiari, corpusque meum exposco ad tumulandum in claustro beatissime sancte Anne penes dominum et dilectum maritum meum. Item quoque peto egregium dominum Ladislaum Hermani dominum et filium meum adoptivum in visceribus Jehsu Christi et ob sui anime salutem, quatenus deum habendo pre oculis fassionem per dominum meum factum super bona possessionaria in prefata Zeyanahrazthya per modum ulciscende vindicte contra iniurias per Anthonium Kapinczy irrogatas et non solum contra ipsum, sed eciam contra alios fratres ipsius domini mei in dampnum vergentem pro talione velit conputare, sicuti vicem dedit aut expensas fecit vel fatigas pertulit, ne anime nostre videlicet domini mariti et mea ac sua in districti iudicis examine premantur angusta. Item lego ducentos florenos claustro beatissime sancte Anne de bonis possessionariis in Zeyanahraztya habitis, super quibus litere habentur erga ipsum dominum Ladislaum Hermani fassionales ob salutem domini et mariti mei ac mee. Item lego similiter centum florenos Nicolao filio Martini Zypzar de Buthkafelde. Item rem paraffernalem michi de predictis provenientem lego, medietatem claustro predicto, medietatem vero ecclesie beatissime virginis gloriose in Zeyanahrazthya fundate ad emendum librum missale ac aliis necessariis ecclesie predicte. Item duos acervos rugum seu tritici lego ad debita pro solvendis mercennariis ac aliis, quibus obligor. Item lego quadraginta unum porcum claustro sepius predicto, octo vero lego puellis seu mulieribus servitricis. Item lego quandam thogam nigram similiter predicto claustro sancte Anne. Item lego unum vitulum uni puelle Elene vocate. Secundum autem lego pro anima mea ad exponendum pauperibus. Item unam parvam crucem lego ecclesie parochiali ecclesie beate virginis in predicta Zeyanahrazthya. Item unum calicem inconsecratum lego, ut dominus et filius meus faciat de bonis meis deaurari et ecclesie beate Marie virginis predicte assignari. Executorem autem huius mei testamenti facio et constituo egregium dominum et filium meum Ladislaum Hermani, ut pro sua vice ac fratrum heremitarum, necnon Nicolai filii Martini predicti Zypzar de predicta Buthkafelde et ecclesie pro vice rerum paraffernalium mearum totalem porcionem possessionariam Zeyanahrazthya tamdiu retineat, quousque sibi et partibus predictis, quibus legatum est et quorum interest, satisfiat. Hec autem acta sunt et facta feria tercia proxima post festum Philipi et Jacobi apostolorum proxime preteritorum (!) anno et loco quibus supra in domo solito habitacionis mee, presentibus religiosis et discretis ac nobilibus viris, videlicet fratre Gallo priore fratrum heremitarum de sancta Anna, fratre Stephano de eadem, Gregorio plebano de Zeyanahrazthya, Michaele similiter plebano de Zenthkiral, Augustino de Chasmafew, Dionisio Barla de eadem, Andrea de Draskowcz et Benkone de Paulowcz ac aliis quampluribus ad hec specialiter rogatis et vocatis. Papíron, kívül zárlatán négy viaszpecsét nyomával. - Regeszta forrása: Publikált regeszta (Mályusz Elemér): LK 7 (1929) 299-300-301 ZEYANAHRAZTHYA-I GERGELY ÖZV KATALIN MAGÁN